म.टा.प्रतिनिधी, औरंगाबाद,
राष्ट्रवादी काँग्रेस पक्षाचे प्रवक्ता प्रशिक्षण विभागाचे प्रदेशाध्यक्ष ख्यातनाम वक्ते प्रदीप सोळुंके यांचा मंगळवारी (४ फेब्रुवारी) आमदार रोहित पवार यांच्या हस्ते सेवा गौरव करण्यात येणार असल्याची माहिती पत्रकार परिषदेत देण्यात आली.
मंगळवारी सकाळी १० वाजता मराठवाडा साहित्य परिषदेच्या यशवंतराव चव्हाण नाट्यगृहामध्ये मान्यवरांच्या उपस्थितीत सोळुंके यांना सेवागौरव पुरस्कार प्रदान करण्यात येणार आहे. अजिंक्य लिंगायत यांच्या शाहीरी पोवाड्याने कार्यक्रम होईल. सेवा गौरव समारंभासाठी आमदार सतीश चव्हाण, आमदार अंबादास दानवे तसेच भाऊसाहेब चिकटगावकर यांची उपस्थिती राहणार आहे. प्रदीप सोळुंके यांचा सत्कार करू इच्छिणाऱ्यांनी ग्रंथ पुस्तकेच आणावी, असे आवाहनही सेवा गौरव समितीने केले आहे. पत्रकार परिषदेसाठी सुधाकर गायकवाड, मनोज कदम, प्रशांत पवार, भाग्यश्री राजपूत यांची उपस्थिती होती.