म. टा. प्रतिनिधी, औरंगाबाद
मराठवाडा युवक विकास मंडळाच्या वतीने प्रल्हादजी अभ्यंकर स्मृती व्याख्यानमाला १४, १५ आणि १६ ऑक्टोबर रोजी तापडिया नाट्यगृहात आयोजित करण्यात आली आहे. यंदा या व्याख्यानमालेचे हे २० वे वर्ष असून, सामाजिक प्रबोधन करण्याच्या हेतुने ही व्याख्यानमाला आयोजित करण्यात आले आहे, अशी माहिती मंडळाचे अध्यक्ष मनोज शेवाळे आणि सचिव व्यंकटेश कमळू यांनी शुक्रवारी पत्रकार परिषदेत दिली.
या व्याख्यानमालेत १४ ऑक्टोबर रोजी पहिले पुष्प भाजपचे राष्ट्रीय उपाध्यक्ष विनय सहस्त्रबुद्धे हे गुंफणार आहेत. सु-शासन व विकासातील अभिनव दृष्टी या विषयावर त्यांचे सायंकाळी साडेसहा वाजता
व्याख्यान होणार आहे. तर मंगळवारी सायंकाळी पावणे सहा वाजता अखिल भारतीय विद्यार्थी परिषदेचे पूर्व प्रांत अध्यक्ष डॉ. नरेंद्र पाठक यांचे साहित्य, समाज व आपण या विषयावर भाष्य करतील.
तर प्रसिद्ध चित्रपट दिग्दर्शक विवेक अग्निहोत्री यांचे हिंदू दर्शन की रचनात्मकता या विषयावर बधुवारी सायंकाळी पावणे सहा वाजता व्याख्यान होईल, अशी माहिती कंबळू यांनी दिली. मंडळाचे सहसचिव राम बुधवंत यावेळी उपस्थित होते.
तीन दिवस चालणाऱ्या या व्याख्यानमालेचे आयोजन तापडिया नाट्यमंदिर येथे करण्यात आले असून नागरिकांनी मोठ्या संख्येने उपस्थित राहावे, असे आवाहन मंडळातर्फे करण्यात आले आहे.