औरंगाबादची प्रिया आयर्लंड विद्यापीठात झाली आंतरराष्ट्रीय अधिकारी

औरंगाबाद: शहरातील प्रिया राजपूत ही आयर्लंडच्या डब्लिन बिझिनेस स्कूलच्या स्टुडंट युनियनमध्ये आंतरराष्ट्रीय अधिकारी म्हणून स्थान मिळविणारी पहिली भारतीय बनली आहे.

पत्रकारितेच्या तिसऱ्या वर्षात शिकत असलेल्या प्रियाने परदेशी भूमीत भारतीय संस्कृतीवर प्रकाश टाकणाऱ्या विविध उपक्रमांचे आयोजन केले असून, तिच्या प्रयत्नांचे विद्यापीठ आणि आयर्लंडमधील राजदूतांनी नेहमीच कौतुक केले आहे. गेल्या दोन वर्षांपासून ती युनियनमध्ये सक्रिय आहे. तिच्या प्रामाणिक, सकारात्मक आणि मेहनती वृत्तीमुळे तिची या पदी निवड झाली आहे. 'डीबीएस' येथे आंतरराष्ट्रीय अधिकारी म्हणून निवडले जाणे ही परदेशी विद्यार्थ्यांसाठी मोठ्या सन्मानाची बाब आहे. हे बहुसांस्कृतिक विद्यापीठ असून, येथे ५०हून अधिक देशांतील विद्यार्थी शिक्षण घेत आहेत. जगाच्या कानाकोपऱ्यातन आलेल्या विद्यार्थ्यांना 'डीबीएस'मध्ये चांगला अनुभव मिळावा ही या संघटनेची भूमिका आहे.