कुटुंब व्यवस्था टिकल्यास समाज सुधारेल : ब्रह्मनाथकर

औरंगाबाद : कुटुंब व्यवस्था टिकली तर समाज सुधारेल आणि समाजाला आज ‘वसुधैव कुटुंबकम्’ ही व्यवस्था शिकवण्याची वेळ आली आहे, असे मत संत साहित्याचे अभ्यासक आणि राष्ट्रीय स्वयंसेवक संघाचे ज्येष्ठ स्वयंसेवक भास्कर ब्रह्मनाथकर यांनी नोंदवले.

संवाद सेतू प्रतिष्ठानच्या दशकपूर्ती सोहळ्यानिमित्त रविवारी (दहा सप्टेंबर) ‘माझे कुटुंब- माझी ऊर्जा’ या विषयावर व्याख्यानाचे आयोजन करण्यात आले होते. यावेळी त्यांनी हे मत नोंदवले. व्यासपीठावर यावेळी पत्रकार मृण्मयी रानडे यांची उपस्थिती होती. ब्रह्मनाथकर म्हणाले, ‘वसुधैव कुटुंबकम् ही व्याख्या आपल्याला संत ज्ञानेश्वरांनी आधी दिली. यानंतर स्वामी विवेकानंद यांनी अमेरिकेत तेथील नागरिकांना बंधु भगिनींनो असे संबोधून जग जिंकले होते. आज मात्र भारतात लिव्ह इन रिलेशनशीप, घटस्फोट, नैराश्ययासारखे प्रश्न निर्माण झाले आहेत. कुटुंब व्यवस्था टिकली पाहिजे. संस्कार, मुले, पालक यांच्यात संवाद आणि जिव्हाळा निर्माण करणे ही आपली आता गरज झाली आहे.’ मृण्मयी रानडे यांनीही मनोगत व्यक्त केले. गेल्या दहा वर्षांपासून संवाद सेतू प्रतिष्ठानमध्ये शुभांगी पाठक, मंजिरी वझे, सत्यप्रभा अष्टपुत्रे, मेधा देशपांडे, अनघा महाजन, माधुरी आफळे, सविता देव, कल्पना देशपांडे, माधुरी धोंड, डॉ. सुनिता डोईबळे, डॉ. ज्योती जोशी, मनिषा कोकीळ, अर्चना नरसापूरकर, सुनिता पिंप्रीकर, साधना सुरडकर, शीला संचेती, डॉ. स्वाती शिरडकर, भावना वैद्य, डॉ. यशस्विनी तुपकरी आदी कार्यरत आहेत.

प्रतिष्ठानतर्फे पालक संवाद
डॉ. सुनिता डोईबळे यांनी संवाद सेतू प्रतिष्ठानमधून गेल्या दहा वर्षांत झालेल्या विविध कार्यक्रमांचा पॉवर पाइंट प्रेझेंटेशनमधून आढावा घेतला. यात त्यांनी किशोरवयीन व तरूण मुलामुलींसाठी कार्यशाळा, पालकांशी सुसंवाद, गप्पाकट्टा, विविध क्षेत्रातील मान्यवरांशी संवाद, मुलाखती, प्रशिक्षणातून सक्षमीकरण, प्रकल्पभेटी, सहली आदी उपक्रम सातत्याने राबवत असल्याचे सांगितले.