म. टा. प्रतिनिधी, औरंगाबाद
रेल्वे स्टेशन आवारातील आरक्षण कार्यालयातून आरक्षित तिकीट देण्याची सुविधा काही दिवसांत बंद पडण्याची शक्यता आहे. येत्या काळात नवीन इमारतीमधील नियमित तिकीट खिडकीशेजारी दोन खिडक्या उपलब्ध करून देऊन आरक्षण सुविधा दिली जाणार आहे.
दक्षिण मध्य रेल्वेचे नांदेड विभागीय व्यवस्थापक उपींदर सिंग काही दिवसांपूर्वी औरंगाबादला भेट देऊन विस्तृत पाहणी केली होती. त्यावेळी त्यांनी तिकीट आरक्षण कार्यालयाच्या इमारतीलाही भेट देऊन येथील कामकाजाचा आढावा घेतला. ते पाहणी करत असताना येथे दोन खिडक्या सुरू होत्या. आरक्षण कार्यालयात कर्मचाऱ्यांची संख्या कमी असल्याची माहिती त्यांना देण्यात आली होती. रेल्वे स्टेशन आवारात तिकीट आरक्षण इमारत दूर आहे. त्यामुळे आरक्षण कार्यालय रेल्वे स्टेशनवरील नियमित तिकीट खिडक्यांच्याशेजारी सुरू करता येईल का, याची चाचपणी करण्याचे निर्देश त्यांनी विभागीय वाणिज्यीक अधिकारी दिवाकर यांना दिले होते.
विभागीय व्यवस्थापकांच्या निर्देशानंतर रेल्वे स्टेशनच्या नवीन इमारतीत दोन खिडक्या आरक्षणासठी देण्याचे नियोजन करण्यात आले आहे. येथे इंटरनेटसह इतर सुविधा पुरविण्याची व्यवस्था केली जात आहे, अशी माहिती रेल्वेच्या सूत्रांनी दिली. मात्र, त्याचवेळी आरक्षण कार्यालयाची इमारत बंद करण्याचा कोणताही आदेश प्राप्त झालेला नसल्याचा दावाही करण्यात येत आहे.
\Bप्रवाशांना त्रास होण्याची शक्यता \B
नवीन इमारतीत आरक्षण कार्यालय स्थलांतर करण्यात येणार आहे. नियमित तिकीट खिडक्यांवर प्रवाशांची मोठी गर्दी असते. येथे आरक्षित तिकीट विक्री सुरू झाल्यानंतर नियमित प्रवाशांना त्रास होण्याची शक्यता आहे. शिवाय तत्काळ तिकीट काढण्यासाठी येणाऱ्या प्रवाशांनाही गैरसोय सहन करावी लागेल.
…
\Bऑनलाइन तिकीट विक्री वाढविण्याचे प्रयत्न \B
सध्या मोठ्या प्रमाणावर ऑनलाइन तिकीट विक्री होत आहे. परिणामी, आरक्षण खिडकीवरील गर्दी कमी झाली, असा दावा करून जास्तीत जास्त प्रमाणात ऑनलाइन रेल्वे तिकीट विक्री वाढविण्यासाठी हा निर्णय घेण्यात आल्याची चर्चा रेल्वे विभागात आहे.