सिल्लोड तालुक्यात तीन आठवड्यानंतर रिमझिम

म. टा. प्रतिनिधी, सिल्लोड
तीन आठवड्याच्या खंडानंतर सिल्लोड तालुक्यात पावसाचे बुधवारी रात्री आगमन झाले. तालुक्यात कमी-जास्त स्वरूपात पाऊस पडला. या पावसाने करपणाऱ्या पिकांना संजीवनी मिळाली आहे. मात्र, जोरदार पाऊस नसल्यामुळे फक्त पिकाची भरणी झाली आहे. पावसामुळे शेतकऱ्यांमध्ये आनंदाचे वातावरण आहे.
मका, कपाशी, सोयबीन, उडीद, मूग, तूर, मिरची या माना टाकलेल्या पिकांना जीवदान मिळाले आहे. पिकांपुरता पाऊस पडला असला तरी तालुक्यात आता जोरदार पावसाची गरज आहे. नदी-नाल्यांना पूर पाणी जाण्याची गरज आहे. ज्या भागात चांगला पाऊस पडला तेथील शेतकऱ्यांनी पिकांना पहिली खताची मात्रा देण्यास सुरूवात केली आहे. मंडळनिहाय पाऊस पुढीलप्रमाणेः सिल्लोड १० मिमी, भराडी ३ मिमी, अंभई १३ मिमी, अजिंठा ०, आमठाणा ५ मिमी, गोळेगाव ४ मिमी, निल्लोड ०, बोरगाव बाजार ३ मिमी, एकूण ३८ मिमी. तालुक्याची सरासरी ४.७५ मिमी.