स्वाभिमान पक्षाने खाते उघडले

खुलताबाद तालुक्यात आमदार बंब यांचा वरचष्मा
स्वाभिमान पक्षाने खाते उघडले
म. टा. प्रतिनिधी, खुलताबाद ः तालुक्यातील १० पैकी ७ ग्रामपंचायतीवर भाजपाचे वर्चस्व सिद्ध झाले. आमदार प्रशांत बंब यांचा या निवडणुकीत वरचष्मा दिसून आला. तालुक्यात भाजप सात, राष्ट्रवादी काँग्रेस एक, काँग्रेस एक, स्वाभिमान पक्ष एक असे पक्षीय बलाबल आहे. ग्रामपंचायतीच्या सरपंच व सदस्य निवडीसाठी झालेल्या निवडणुकीची मतमोजणी सोमवारी सकाळी दहा वाजता श्री भद्रा मारुती भक्तनिवास सभागृहात पार पाडली. प्रथमच थेट जनतेतून सरपंच निवडणूक झाल्याने सकाळपासून ग्रामीण भागातील नागरिकांनी मोठी गर्दी केली होती.
भाजपचे पंचायत समिती उपसभापती गणेश जिजाबा अधाने व शिवसेनेचे संघटक गणेश भिकन अधाने यांच्या नेतृत्वाखालील विरमगाव ग्रामपंचायतीची निवडणूक लक्षवेधी ठरली. या निवडणुकीत भाजपच्या सविता अधाने सरपंचपदी निवडून आल्या त्यांनी शिवसेना पुरस्कृत प्रियंका अधाने यांचा पराभव केला. तालुक्यातील १० पैकी ७ ग्रामपंचायतींवर भाजपाचे वर्चस्व सिद्ध झाले आहे. यात विरमगाव , पळसगाव, सुलीभंजन, कानडगाव, दरेगाव, पाडळी, येसगाव आदी ग्रामपंचायतींचा समावेश आहे.
महाराष्ट्र स्वाभीमान पक्ष
लोणी ता. खुलताबाद सरपंचपदासह माजी मुख्यमंत्री नारायण राणे यांच्या स्वाभिमान पक्षांचे सुदाम मामा सोनवणे यांच्या पॅनल मधील १० पैकी १० जागा जिंकून खाते उघडले आहे. सुदाम मामा सोनवणे यांनी नवनिर्वाचित सरपंच व सदस्य यांचे निवडून आल्याबद्दल अभिनंदन केले.
लोणी येथील प्रभाग क्रमांक एक मधील मंदाबाई ठोंबरे व ज्योती वाडेकर यांना २५६ समान मते मिळाल्याने चिठ्ठीद्वारे सोडत होऊन मंदाबाई ठोंबरे या विजयी झाल्या. विरमगाव येथील प्रभाग क्रमांक दोन मधील अनिता राजू अधाने व छाया देविदास अधाने यांना १२९ समसमान मते पडल्याने चिठ्ठीद्वारे सोडत होऊन छाया देविदास अधाने या विजयी झाल्या.
निवडून आलेले सरपंच
देवळाणा बुद्रुक अपक्ष नसरीन पठाण, विरमगाव भाजप सविता अधाने, कानडगाव भाजप स्वाती जाधव (बिनविरोध ), दरेगाव भाजप जयश्री बोर्डे, पळसगाव भाजप निमाबाई ताटू, मंदाबाई कर्दळ, लोणी स्वाभिमान पक्ष सुलतानबी शकील पटेल, सुलीभंजन भाजप सय्यद इलियास सय्यद युनूस, पाडळी भाजप बाबुराव वाहटूळे, चिंचोली राष्ट्रवादी कॉग्रेस ज्ञानेश्वर दुधारे, येसगाव भाजप सरुबाई खंडागळे.