केटरिंग चालकावर हल्ला; दोघांना एक वर्ष सक्तमजुरी

म. टा. प्रतिनिधी, औरंगाबाद
केटरिंग चालकावर हल्ला करणाऱ्या दोघांना एक वर्ष सक्तमजुरी व प्रत्येकी दोन हजार रुपये दंडाची शिक्षा प्रथम वर्ग न्यायदंडाधिकारी एस. एस. जांभळे यांनी ठोठावली.

याप्रकरणी उत्तम कर्नाळे यांनी फिर्याद दिली होती. फिर्यादीनुसार, फिर्यादीचा केटरिंगचा व्यवसाय आहे. फिर्यादीने केटरिंगचे काम करण्यासाठी मजूर बदलल्याचा मनात राग धरून १४ मार्च २०१५ रोजी सायंकाळी विश्वकर्मा मंगल कार्यालयाच्या पाठीमागे फिर्यादीला अडवून किरण खरात, सिद्धार्थ काजळे व रमेश काजळे यांनी शिविगाळ करत मारहाण केली. तिघांपैकी एकाने फिर्यादीवर ब्लेडने वार केल्याने फिर्यादी जखमी झाला. फिर्यादीच्या तक्रारीवरुन तिघांविरोधात उस्मानपुरा पोलिस ठाण्यात गुन्हा दाखल करुन कोर्टात दोषारोपपत्र दाखल केले. खटल्यावेळी, सहाय्यक सरकारी वकील बी. एम. राठोड यांनी सहा साक्षीदारांचे जबाब नोंदविले. दोन्ही बाजुंच्या युक्तिवादावरुन व साक्ष-पुराव्यांवरून कोर्टाने किरण जयाजी खरात व सिद्धार्थ शेषराव काजळे यांना प्रत्येकी एक वर्ष सक्तमजुरी व दोन हजार रुपये दंड व दंड न भरल्यास एक महिना कारावासाची शिक्षा सुनावली, तर सबळ पुराव्याअभावी रमेश काजळे यास कोर्टाने निर्दोष मुक्त केले.