मराठवाड्यात ५०० कोटींची अघोषित संपत्ती

मटा ऑनलाइन वृत्त । औरंगाबाद

'दुष्काळग्रस्त' अशी ओळख असलेल्या मराठवाड्यात तब्बल ५०० कोटींची अघोषित संपत्ती उघडकीस आली आहे. 'इन्कम डिक्लेरेशन योजनें'तर्गत ही अघोषित संपत्ती उघड झाली आहे.

केंद्रात मोदी सरकार आल्यापासून नोटाबंदीसह आर्थिक देवाण-घेवाणसंबंधी अनेक निर्णय घेण्यात आले आहेत. कर चुकवेगिरी करणाऱ्यांसाठी केंद्र सरकारने 'इन्कम डिक्लेरेशन योजना' सुरू केली आहे. या योजनेंतर्गत मराठवाड्यातील औरंगाबाद, बीड, जालना, उस्मानाबाद, लातूर, नांदेड, परभणी, हिंगोली या ८ जिल्ह्यात ५०० कोटींची रक्कम जमा झाली आहे. तसेच 'प्रधानमंत्री गरीब कल्याण योजनें'तर्गत आयकर विभागाला ४९ कोटी रुपये मिळाले असून गतवर्षीच्या तुलनेत १ लाख २५ हजार करदात्यांची संख्या वाढली आहे.

'इन्कम डिक्लेरेशन योजनें'तर्गत आयकर विभागाने १४८ ठिकाणी पाहणी केली. त्यात दोषी आढळलेल्या लोकांना या योजनेची माहिती दिली, त्यामुळे १४५ कोटी रुपयांची अघोषित रक्कम जमा झाली. मराठवाड्यातून ६४५ कोटीची संपत्ती घोषित झाली. ही रक्कम नाशिक विभागापेक्षा अधिक आहे. मराठवाड्यात कर भरणाऱ्यांच्या संख्येतही मोठी वाढ झाली आहे. गेल्यावर्षी मराठवाड्यात करदात्यांची संख्या २ लाख ३० हजार होती. यावर्षी १ लाख २५ हजारांची वाढ झाली आहे.

दरम्यान, मराठवाड्यात गेल्या तीन वर्षापासून दुष्काळ आहे. दुष्काळामुळे कर्जबाजारीपणाला कंटाळून अनेक शेतकरी आत्महत्या करीत आहेत. दुष्काळग्रस्त मराठवाड्यात एकीकडे शेतकऱ्यांच्या आत्महत्येचे सत्र सुरू असताना करदात्यांची संख्या लाखोंनी वाढत असल्याने आश्चर्य व्यक्त केले जात आहे.