म. टा. प्रतिनिधी, औरंगाबाद
एस. टी. बँकेच्या गेल्या महिन्यात झालेल्या बैठकीत १० ऑगस्ट रोजी लाभांश देण्याची घोषणा करण्यात आली होती. त्या घोषणेनुसार अद्याप लाभांश दिलेला नाही. त्यामुळे महाराष्ट्र कामगार सेनेतर्फे एसटी बँकेसमोर मंगळवारी निर्दशने करण्यात आली.
औरंगाबाद येथील महाराष्ट्र एसटी कामगार सेना विभागातर्फे कामगार भवन येथील एस. टी. बँकेच्या प्रवेशद्वारासमोर निदर्शन करण्यात आली. बँकेच्या ठेवीदाराला ठेवींवर ८.५० टक्के दराने व्याज मिळते व बँकेकडून घेतलेल्या कर्जावर १२.५० टक्के व्याज आकारले जाते. हा दर जाचक असून व्याजदर दोन टक्क्याने कमी करावा, १५ टक्के लाभांश द्यावा, तसेच १० ऑगस्ट रोजीचा नफा भागधारकांना वाटप करावा, आदी मागण्या करण्यात आल्या. यावेळी संघटनेचे विभागीय सचिव शिवाजी बोर्डे, उषा मेहत्रे, विनायक हाके, सुरेश जाधव, मनोज चंदनशिवे, मंगेश मांगूळकर, रामेश्वर वानखेडे, उल्हास चव्हाण, गणेश वंजारे, महेश बोचरे, ज्ञानेश्वर मुंडे, साईनाथ दौड, राम पेहेरकर, अमोल ढोकणे, मनोज उगले यांच्यासह कार्यकर्त्यांची उपस्थिती होती.