म. टा. प्रतिनिधी, औरंगाबाद
विक्री केलेल्या कारची पुन्हा विक्री केल्याप्रकरणी सहारा मोटर्सच्या तिघांविरुद्ध सिडको एमआयडीसी पोलिस ठाण्यात फसवणुकीचा गुन्हा दाखल करण्यात आला. कोर्टाच्या आदेशाने हा गुन्हा दाखल झाला. एक जून २०१३ रोजी एपीआय कॉर्नर भागात हा प्रकार घडला होता.
याप्रकरणी काझी सय्यद सल्लाऊदीन काझी सय्यद नझरुल हसन (वय ६५, रा. हिमायतबाग) यांनी तक्रार दाखल केली. काझी यांनी यांनी सहारा मोटर्स येथून मुलाच्या नावावर सहा लाख पंधरा हजारांत कार विकत घेतली होती. ही कार बंद पडल्याने त्यांनी कार दुरुस्तीसाठी शोरूममध्ये नेली. यावेळी त्या ठिकाणी त्यांना ही कार १५ सप्टेंबर २०१२ रोजीच संजय दत्तात्रय नावाच्या व्यक्तीला विकल्याची माहिती मिळाली. ही कार जुनी असताना देखील तिला नवीन भासवून तिची विक्री काझी यांना केल्याचे निष्पन्न झाले. याप्रकरणी काझी यांनी कोर्टात धाव घेतली. कोर्टाने पोलिसांना गुन्हा दाखल करण्याचे आदेश दिले. या आदेशावरून मंगळवारी संशयित आरोपी आषीश भोपकर, अमीरबान सेन गुप्ता, अविनाश सूर्यवंशी (सर्व रा. सहारा मोटर्स, एपीआय कॉर्नर) यांच्याविरुद्ध फसवणुकीचा गुन्हा दाखल करण्यात आला. याप्रकरणी सहायक फौजदार शिंदे तपास करीत आहेत.