म.टा. प्रतिनिधी, औरंगाबाद -
माजी सैनिकांचा समावेश असलेले नऊ झोन कार्यालयांसाठी नऊ उपद्रवशोध पथक स्थापन करण्याचा निर्णय महापालिकेच्या मंगळवारी झालेल्या सर्वसाधारण सभेत घेण्यात आला. या पथकांवर वर्षभरात दोन कोटी २१ लाख २१ हजार ४८० रुपये खर्च केले जाणार आहेत.
उपद्रव शोधपथकाच्या संदर्भात पालिका आयुक्तांनी प्रस्ताव सादर केला होता. त्यात त्यांनी म्हटले आहे की, 'महापालिका क्षेत्रात सध्याच्या स्थितीत नागरी घनकचरा व्यवस्थापनांतर्गत शहर स्वच्छतेच्या बाबतीत विविध स्तरावरून कारवाई सुरू आहे. ही कारवाई करताना असे लक्षात येते की, शहराच्या काही भागात काही नागरिकांच्या बेजबाबदारपणामुळे अस्वच्छता निर्माण होत आहे. महापालिका कर्मचाऱ्यांकडून दंडात्मक कारवाई देखील सुरू करण्यात आली आहे, पण त्यास अपेक्षित प्रतिसाद मिळत नाही. त्यामुळे झो कार्यालयनिहाय उपद्रव शोधपथक स्थापन करण्याचे नियोजन आहे. एका पथकात नऊ माजी सैनिकांचा समावेश असेल. प्रत्येक माजी सैनिकांना दरमहा १५ हजार रुपये वेतन दिले जाईल. नागरिकांकडून वसूल करण्यात आलेल्या दंडाच्या रक्कमेतून काही रक्कम प्रोत्साहन भत्ता म्हणून दिली जाईल. एका पथकास एका चार चाकी वाहनाची व्यवस्था केली जाईल. पथकातील माजी सैनिकांना विशिष्ट प्रकारचे दोन गणवेश उपलब्ध करून दिले जातील, त्याशिवाय त्यांना ओळखपत्र देखील दिले जाईल. पथकाच्या सोबत एका कॅमेरामनची देखील नियुक्ती केली जाईल.
नऊ उपद्रव शोधपथकांवर एका वर्षात २ कोटी २१ लाख २१ हजार ४८० रुपये खर्च केले जातील.