म. टा. प्रतिनिधी, औरंगाबाद
नायट्रोसन या नशेच्या गोळ्याची अवैध विक्री करणाऱ्या आरोपीला जिन्सी गुन्हे प्रकटीकरण पथकाने जेरबंद केले. चंपा चौकात ही कारवाई रविवारी दुपारी करण्यात आली. आरोपीच्या ताब्यातून पाच हजार गोळ्यांचा साठा जप्त करण्यात आला आहे.
चंपा चौक परिसरात दुचाकीवर एक आरोपी नशेच्या नायट्रोसन गोळ्या विक्रीसाठी घेऊन येणार असल्याची माहिती गुन्हे प्रकटीकरण पथकाला मिळाली होती. या माहितीवरून पथकाने सापळा रचला. यावेळी दुपारी दोनच्या सुमारास काळ्या बॅगसह एका संशयित आरोपीला ताब्यात घेण्यात आले. या बॅगची तपासणी करण्यात आली असता आतमध्ये नायट्रोसन गोळ्याच्या ५०० स्ट्रीप (पाच हजार गोळ्या, किंमत २३ हजार रुपये) आढळून आल्या. पोलिसांनी संशयित आरोपी सय्यद झकियोद्दिन सय्यद शमशुद्दिन (वय २६, रा. नायगाव रोड, सावंगी) याला अटक केली. ही कारवाई पोलिस आयुक्त चिरंजीवप्रसाद, उपायुक्त डॉ. राहुल खाडे, एसीपी गुणाजी सावंत, नागनाथ कोडे यांच्या मार्गदर्शनाखाली पोलिस निरीक्षक श्यामसुंदर वसुरकर, पीएसआय दत्ता शेळके, सहायक फौजदार अयूब पठाण, संजय गावंडे, धनंजय पाडळकर, गणेश नागरे यांनी केली.