भावनगरच्या गांधी कॉलेजचे उल्लेखनीय यश

भावनगरच्या गांधी कॉलेजचे उल्लेखनीय यश
एसएनडीटी महिला क्रीडा स्पर्धा
म. टा. प्रतिनिधी, औरंगाबाद
अखिल भारतीय एसएनडीटी आंतर महाविद्यालयीन क्रीडा स्पर्धेत भावनगरच्या एन. सी. गांधी कॉलेज संघाने विविध प्रकारात उल्लेखनीय यश मिळवले.
विभागीय क्रीडा संकुलात या स्पर्धेचा रविवारी समारोप झाला. हँडबॉल, क्रिकेट, बेसबॉल, योगासन व ज्युदो या पाच क्रीडा प्रकारांचा समावेश या स्पर्धेत होता. विधानसभा अध्यक्ष हरिभाऊ बागडे यांच्या हस्ते विजेत्या, उपविजेत्या खेळाडूंना पारितोषिकांचे वितरण करण्यात आले. या प्रसंगी गिर्यारोहक मनीषा वाघमारे, विकास माने, शरद भट्ट, एसएनडीटी महिला विद्यापीठाच्या क्रीडा संचालक लिंडा डेनिस, महाविद्यालयाचे संचालक पंकज भारसाखळे, प्राचार्य केजल भट्ट, श्यामसुंदर भालेराव यांची प्रमुख उपस्थिती होती. एसएनडीटी महिला विद्यापीठ यंदा १०१वे वर्ष साजरे करीत आहे. त्यामुळे या स्पर्धेला विशेष महत्त्व प्राप्त झाले होते.
खेळाडूंना मार्गदर्शन करताना बागडे म्हणाले, ‘खेळाडूंनी स्वतःसह राज्याचे क्रीडा क्षेत्रात नाव उंचवण्याचा प्रयत्न केला पाहिजे. खेळाचा प्रचार व प्रसारासाठी शासन खेळाडूंसोबत आहे.’ मनीषा वाघमारे म्हणाल्या, ‘खेळाडूंनी दैनंदिन जीवनात किमान वीस मिनीटे व्यायाम करायला हवा. खेळात यश-अपयश हे येतच असते. अपयश आल्यावर निराश न होता पुढील स्पर्धेत अधिक चांगली कामगिरी करण्याचा प्रयत्न करायला हवा.’ स्पर्धेच्या यशस्वी आयोजनासाठी भाग्यश्री मुंडे, विनोद कंकाळ, विजय जाधव, केतकी चौधरी, जगदीश जाधव, बाबासाहेब शेजवळ आदींनी पुढाकार घेतला.
अंतिम निकाल ः हँडबॉल - १. एन. सी. गांधी कॉलेज, भावनगर (गुजरात), २. सी. बी. शहा कॉलेज, सांगली, ३. बीसीए अँड होमसायन्स कॉलेज, लोणी. उत्कृष्ट खेळाडू - जागृती गोहिल, वैशाली सूर्यवंशी, रोहिणी जगदाळे.
क्रिकेट ः १. बीसीए अँड होम सायन्स कॉलेज, लोणी, २. सी. बी. शहा कॉलेज, सांगली, ३. मनीबेन नानावटी कॉलेज, विलेपार्ले, मुंबई. उत्कृष्ट खेळाडू - रोहिणी जगदाळे, प्रतीक्षा भायडेकर, निलोफर नायर.
बेसबॉल ः १. सी. बी. शहा कॉलेज, सांगली, २. होम सायन्स कॉलेज, अकलुज, ३. एस. एम. देसाई कॉलेज. उत्कृष्ट खेळाडू - प्रतीक्षा भायडेकर, प्राजक्ता कुलकर्णी, स्वाती वाघमोडे.
योगासन - १) कला व वाणिज्य कॉलेज, चर्चगेट, २. होम सायन्स कॉलेज, अकुलज, ३. एन. सी. कॉलेज, भावनगर. उत्कृष्ट खेळाडू - अनिता लुंबानी, कुसुम प्रजापती, चैताली नायगुंडे.
ज्युदो ः १. एन. सी. गांधी कॉलेज, भावनगर, २. एस. एम. आर. के. कॉलेज, नाशिक, ३. कला व वाणिज्य व बीसीए कॉलेज, धुळे. उत्कृष्ट खेळाडू - विद्यावती इंगळे, मोनाली वाघमोडे, शिवानी थट्टेकर.