St Strike News : कामावर रुजू होऊनही घडला धक्कादायक प्रकार, अखेर एसटी कर्मचाऱ्याचं टोकाचं पाऊल

औरंगाबाद : विलीनीकरणाच्या मागणीसाठी गेली चार महिने एसटी कर्मचारी संपावर आहे. मात्र, सरकारच्या काही अश्वासनावर विश्वास ठेवून अनेक कर्मचारी कामावर हजर सुद्धा झाले. तरीही वेळेवर पगार मिळत नसल्याने औरंगाबाद येथील एसटी बसचालकाने आर्थिक विवंचनेतून गळफास घेऊन आत्महत्या केली आहे. संतोष बन्सी चाबुकस्वार (४०, रा. भीमनगर, नागरे बाभुळगाव, ता. गंगापूर) असे मृत चालकाचे नाव आहे.

मिळालेल्या माहितीनुसार, बाभुळगाव येथील भीमनगरात राहणारे संतोष चाबुकस्वार हे गंगापूर एसटी आगारात चालक म्हणून कार्यरत होते. संतोष चाबुकस्वार हे गेल्या काही दिवसांपासून आर्थिक विवंचनेमुळे अडचणीत होते. रविवारी रात्री नेहमीप्रमाणे ते घरातील एका खोलीत झोपी गेले. सोमवारी सकाळी कुटुंबियांनी त्यांना उठवण्यासाठी दरवाजा वाजवला. परंतु, ते घरातील लोखंडी रॉडला लटकलेल्या अवस्थेत दिसून आले. चाबुकस्वार यांना लासूर स्टेशन प्राथमिक आरोग्य केंद्रात त्यांना दाखल केले असता डॉक्टरांनी तपासून मृत घोषित केले.

पत्नी गर्भवती राहिली म्हणून पतीचं भयंकर कृत्य, पीडितेला दिल्या गर्भपाताच्या गोळ्या...

कामावर हजर होऊनही पगार नाही...

चार महिन्यांपूर्वी एसटी कर्मचाऱ्यांनी संपाची हाक दिली. ज्यात राज्यभरातील कर्मचारी सहभागी झाले होते. त्यात चाबुकस्वार सुद्धा संपावर होते. मात्र, संपावर असताना पगार सुद्धा बंद झाल्याने ते आर्थिक अडचणीत सापडले होते. दरम्यान, सरकारने पुन्हा कर्मचाऱ्यांना कामावर हजर राहण्याचे आवाहन केले, त्यामुळे चाबुकस्वार कामावर हजर झाले. पण त्यानंतरसुद्धा वेळेवर पगार मिळत नसल्याने अनंत अडचणी निर्माण होऊ लागल्या. त्यामुळे कुटुंबात वाद होत होते. अशात आर्थिक विवंचनेतून चाबुकस्वार यांनी गळफास घेऊन आत्महत्या केली असल्याचं त्यांच्या कुटुंबातील सदस्यांनी सांगितले.

आसानी चक्रीवादळ अंदमान- निकोबारमध्ये दाखल; मुंबईतही ढगाळ वातावरण