संत नरहरी सोनार अध्यासन केंद्र सुरू करा

औरंगाबाद : डॉ. बाबासाहेब आंबेडकर मराठवाडा विद्यापीठात संत शिरोमणी नरहरी सोनार यांच्या नावाने अध्यासन केंद्र सुरू करावे, अशी मागणी पुरोगामी सामाजिक आणि सांस्कृतिक महासंघाने कुलगुरू डॉ. बी. ए. चोपडे यांच्याकडे केली आहे. याबाबत महासंघाचे अध्यक्ष समाधान दहिवाळ यांनी चोपडे यांना निवेदन दिले. जातीयता, असहिष्णुता दूर करून सामाजिक सलोखा निर्माण करण्याचे महान कार्य संतांनी केले. प्रतिकूल स्थितीत मानवतेची ज्योत तेवत ठेवली. मात्र, सध्या धार्मिकता व विषमता जोपासणाऱ्या संतांचा उदो-उदो केला जात असून समतेची भाषा करणाऱ्या संतांच्या कार्याची हेटाळणी सुरू आहे. अनेक विद्यापीठांत संतांच्या नावाने अध्यासन केंद्र आहेत. संत नामदेव वगळता एकाही बहुजन संताच्या नावाने अध्यासन केंद्र नाही. व्यवस्थेच्या संकुचित द‍ृष्टिकोनामुळे संत साहित्यावर व शिकवणीवर मंथन होत नाही. त्यामुळे संत नरहरी सोनार यांच्या नावे अध्यासन केंद्र सुरू करा, अशी मागणी निवेदनात करण्यात आली आहे.