म. टा. प्रतिनिधी, औरंगाबाद
दारू पिऊन चालणाऱ्या व्यक्तीचे पाय रुळात अडकले. त्यावरून रेल्वे गेल्याने डाव्या पायाचा अक्षरश: चुरा झाल्याची अंगावर शहारा आणणारी घटना सोमवारी संग्रामनगर रेल्वे क्रॉसिंगजवळ घडली. मुन्ना पापण्णा बोगल्लू (रा. चौसरनगर, शहानूरवाडी) असे जखमी व्यक्तीचे नाव आहे.
विशेष पोलिस अधिकारी श्रीमंत गोर्डे पाटील यांनी दिलेल्या माहितीनुसार, मुन्ना पापण्णा बोगल्लू हा पत्नीपासून विभक्त झाला होता. सध्या तो आपल्या बहिणीसोबत रहात होता. चौसरनगर भागात राहणाऱ्या मुन्नाचे सोमवारी बायकोशी जोरदार भांडण झाले. या भांडणानंतर मुन्ना दारू पिण्यासाठी गेला. सायंकाळी सव्वापाचच्या सुमारास तो दारू पिऊन रेल्वे रूळावरून जात होता. त्याचवेळी औरंगाबादहून जालनाकडे जाणारी मालगाडी या रूळावर आली. रेल्वे येत असल्याचे पाहून मुन्नाने रूळावरून निघण्याचा प्रयत्न केला. यावेळी मुन्नाचा डावा पाय रूळात अडकला. हा पाय काढता न आल्याने रेल्वे त्याच्या पायावरून गेली. त्यामुळे या पायाचा मांडीपासून चक्क चुरा झाला. जखमी झाल्यानंतर तो आपल्या पायाकडे बघत राहिला. ही अंगावर काटा आणणारी घटना पाहून अबेद पठाण, नितीन वाहुळ व सुशील कांकरिया धावून आले. त्यांनी जखमीला उपचारासाठी रूग्णालयात दाखल केले. जखमी झालेल्या मुन्ना याला दोन मुले आणि दोन मुली आहेत, अशी माहिती गोर्डे-पाटील यांनी उस्मानपुरा पोलिस ठाण्याला दिली.