सावत्र पित्याकडून चिमुकल्याचे अपहरण

औरंगाबाद ः दुसऱ्या पत्नीला अपत्य होत नसल्याने सावत्र पित्याने पहिल्या पत्नीच्या दीड वर्षाच्या मुलाचे अपहरण केले. गाजगाव (ता. गंगापूर) येथे गुरुवारी पहाटे हा प्रकार घडला. रेल्वेतून पसार होत असताना मनमाड येथे या पित्याला पोलिसांनी ताब्यात घेऊन चिमुकल्याची सुटका केली.
गाजगाव येथे एक २५ वर्षांची महिला पती व दीड वर्षाच्या मुलासह राहते. या महिलेच्या पहिल्या पतीने तिला सोडून दिले असून, तिने दुसरा विवाह केला आहे. या महिलेच्या पहिल्या पतीचाही दुसरा विवाह झाला आहे. गुरुवारी पहाटे पाच वाजता महिलेच्या पहिल्या पतीने तिच्या दीड वर्षाच्या मुलाला सोबत घेत पलायन केले. महिलेच्या लक्षात हा प्रकार येताच तिने सिल्लेगाव ठाणे गाठून माहिती दिली.
दरम्यान, मुलाला घेऊन पसार झालेला पती लासूर स्टेशनजवळ असलेल्या कृषी उत्पन्न बाजार समितीच्या आवारात लपून बसला होता. लासूर स्टेशन येथे दुपारी दुपारी साडेबारा वाजता त्याने पत्नी, चिमुकल्यासह स्टेशन गाठले व मनमाडकडे प्रयाण केले. हा प्रकार समजल्यामुळे मुलाची आई स्टेशनवर पोचली होती. रेल्वे निघून गेल्याने तिने स्टेशन मास्तराला हा प्रकार सांगितला. त्यांनी रेल्वे प्रवासी सेनेचे अध्यक्ष संतोषकुमार सोमाणी यांना ही घटना कळविली. आईकडे असलेल्या मुलाच्या फोटोवरून फोटो काढूत सोमाणी यांनी त्यांच्या रेल्वे प्रवासी सेना व महाराष्ट्र पोलिस मित्र या व्हॉट्स अॅप ग्रुपवर टाकला. या पोस्टमुळे हायकोर्ट एक्स्प्रेसमध्ये या चिमुकल्याला घेऊन एक जोडपे जात असल्याची माहिती हाती आली. औरंगाबाद रेल्वे पोलिस विभागाचे एपीआय भगवान कांबळे, पीएसआय बनसोड, गोंडे यांनी मनमाड पोलिसांना ही माहिती कळवली. दुपारी दोन वाजता मनमाड पोलिसांनी या चिमुकल्यासह सावत्र पित्याला व पत्नीला ताब्यात घेतले.

तक्रार देण्यास नकार
औरंगाबाद लोहमार्ग पोलिसांच्या पथकाने मुलाच्या आईसोबत मनमाड गाठत चिमुकल्याला ताब्यात घेतले, मात्र मुलाच्या आईने पतीविरुद्ध तक्रार देण्यास नकार दिल्याने पतीला समज देऊन पोलिसांनी सोडले.