म. टा. प्रतिनिधी, औरंगाबाद
मोकाट कुत्र्यांवर नसबंदी शस्त्रक्रिया करण्यासाठी झारखंड येथील हेल्थ ऑर्गनायझेशन फॉर पीपल्स अँड अॅनिमल ट्रस्ट या संस्थेची निविदा महापालिकेने स्वीकारली आहे. एका कुत्र्याला पकडून त्यावर शस्त्रक्रिया करण्यासाठी या संस्थेने ९५० रुपयांची मागणी केली आहे. संस्थेला काम सुरू करण्यासाठी दहा दिवसांचा वेळ देण्यात आला आहे.
शहरात सुमारे ४० हजार मोकाट कुत्रे असण्याची शक्यता असून त्यामुळे नागरिक आहेत. विशेषत: लहान मुलांमध्ये या कुत्र्यांची दहशत आहे. पालिकेने गेल्यावर्षी ब्ल्यू क्रॉस या संस्थेला एका कुत्र्यासाठी ९०० रुपये या दराने कंत्राट दिले होते. हे कंत्राट संपल्यानंतर काढलेल्या निविदा प्रक्रियेत झारखंड येथील संस्थेची निविदा स्वीकारण्यात आली आहे. काम सुरू होईपर्यंत ब्ल्यू क्रॉस संस्थेला काम करण्यास सांगण्यात आले आहे. ब्ल्यू क्रॉस संस्थेचे १७ लाखांची थकबाकी पाठपुरावा करूनही मिळत नसल्याने या संस्थेने नवीन कंत्राट घेण्यास उत्सुकता दाखवली नसल्याचे बोलले जाते.
\Bफेरीवाल्यांचे सर्वेक्षण; संस्था नियुक्त \B
शहरातील फेरीवाल्यांचे सर्वेक्षण करण्यासाठी शासनाने औरंगाबाद शहरातील 'युवा' संस्थेला मान्यता दिली आहे. फिरते फेरीवाले, कायम फेरीवाले यांचे सर्वेक्षण या संस्थेमार्फत केले जाणार आहे. एका फेरीवाल्याच्या सर्वेक्षणासाठी संस्थेला १२० रुपये मिळणार आहे. येत्या आठ दिवसात सर्वेक्षणाचे काम सुरू होण्याची शक्यता आहे.