\Bम. टा. प्रतिनिधी, औरंगाबाद\B
कॉर्पोरेट क्षेत्रातील संधी आणि औद्योगिक कंपन्याची कामकाज पद्धती याचा अनुभव घेतल्यानंतर विद्यार्थी भारावून गेले. आठशे विद्यार्थ्यांना या क्षेत्रातील तज्ज्ञांनी मार्गदर्शन केले.
डॉ. बाबासाहेब आंबेडकर मराठवाडा विद्यापीठाच्या आणि इन्फोसिस कंपनीच्या कराराअंतर्गत औद्योगिक भेट व अभ्यास दौरा घेण्यात आला. या भेटीत विद्यापीठातील विभाग व १५ महाविद्यालयातील आठशे विद्यार्थी व प्राध्यापक सहभागी झाले. इन्फोसिस कंपनीला भेट दिल्यानंतर औद्योगिक कंपनीचे कामकाज, बीपीओ क्षेत्रातील संधी, विद्यार्थ्यांनी स्वत:ला संधीसाठी पात्र बनवणे आणि कॉर्पोरेट क्षेत्रातील पदार्पणावर मार्गदर्शन करण्यात आले. या क्षेत्रातील प्रयत्न, करिअर, मुलाखत कौशल्ये आणि आत्मविश्वासाची तज्ज्ञांनी माहिती दिली. विद्यापीठ आणि इन्फोसिसच्या कराराअंतर्गत ८० ते १०० प्राध्यापक इन्फोसिसमध्ये दरवर्षी फॅकल्टी डेव्हलमेंट प्रोग्रामला (पुणे) जातात. कुलगुरू डॉ. प्रमोद येवले यांच्या मार्गदर्शनाखाली 'प्लेसमेंट सेल'च्या वतीने उपक्रम घेतले जातात. विद्यापीठातील ट्रेनिंग आणि प्लेसमेंट सेल दरवर्षी इंडस्ट्रीयल व्हीजिटचे आयोजन करीत असते, अशी माहिती प्लेसमेंट विभागप्रमुख डॉ. गिरीश काळे यांनी दिली.