म. टा. प्रतिनिधी, औरंगाबाद
डॉ. आकांक्षा देशमुख हिचा खून होऊन सहा दिवस पूर्ण झाले असून अद्याप मारेकऱ्यांचा शोध लागलेला नाही. शोध घेऊन मारेकऱ्यास अटक करावी, मृत आकांक्षाला न्याय द्यावा या मागणीसाठी सोमवारी 'एमजीएम'मध्ये विद्यार्थ्यांनी आंदोलन केले.
'एमजीएम'च्या फिजीओथेरेपी महाविद्यालय परिसरात झालेल्या या ठिय्या आंदोलनाचे नेतृत्व अखिल भारतीय विद्यार्थी परिषदेने केले.
सहा दिवस उलटूनही डॉ. आकांक्षा देशमुख हिच्या मारेकऱ्याचा शोध लागला नसल्याने विद्यार्थ्यांमध्ये अस्वस्थता आहे. त्यामुळे झालेल्या आंदोलनात सहभागी विद्यार्थ्यांनी फिजीओथेरेपी महाविद्यालयाच्या प्राचार्यांना मागण्यांचे निवेदन दिले. त्यानंतर ठिय्या आंदोलन सुरू केले. 'अभाविप'चे कार्यकर्ते आणि विद्यार्थ्यांनी संस्थाचालकांना भेटण्याचा आग्रह धरला. त्यामुळे संस्थेचे सचिव अंकुशराव कदम यांनी कार्यकर्ते आणि विद्यार्थ्यांची भेट घेतली. डॉ. आकांक्षा देशमुख हिच्या मृत्युनंतर तिला उचलून नेऊन पुरावे नष्ट करणाऱ्या संबंधित कर्मचारी आणि वार्डनवर कारवाई करण्याची मागणी यावेळी विद्यार्थ्यांनी कदम यांच्याकडे केली. यावेळी 'अभाविप'च्या कार्यकर्त्यांकडून वाद वाढविण्याचा प्रयत्न होत असल्याने पोलिस निरीक्षक निर्मला परदेशी यांनी मध्यस्थी करत कार्यकर्ते आणि विद्यार्थ्यांना बाहेर काढले. दरम्यान, संस्थाचालकांना भेटण्यासाठी गेलेल्या वसतिगृहातील विद्यार्थिनींनी भीतीचे वातावरण असल्याचे सांगितले. वॉशरूममध्ये जाण्यासाठी मुली घाबरत असल्याचे मत मांडले.
……
\B'अभाविप'ने जोडला 'राफेल'चा संबंध \B
संस्थाचालकांची भेट घेतल्यानंतर 'अभाविप'च्या कार्यकर्त्यांनी माजी मुख्यमंत्री पृथ्वीराज चव्हाण यांच्याकडून मारेकऱ्यांना वाचवण्यासाठी पोलिसांवर दबाव आणला जात आहे, असा आरोप केला. माजी मुख्यमंत्री चव्हाण यांचा राफेल विमान खरेदीतील भ्रष्टाचारावर रविवारी 'एमजीएम'मध्ये कार्यक्रम आयोजित करण्यात आला होता. या आरोपाचे संस्थेचे सचिव अंकुशराव कदम यांनी खंडन केले. भाजपचा कार्यक्रमही 'एमजीएम' परिसरात होत असल्याची माहिती त्यांनी 'अभाविप'च्या कार्यकर्त्यांना दिली. दरम्यान, यावरून वातावरण तापले होते.
डॉ. आकांक्षा देशमुख हिच्या मारेकऱ्यांचा पोलिसांकडून शोध घेतला जात आहे. ते निश्चितच मारेकऱ्याला शोधून काढतील. वसतिगृहातील अनेक मुलींमध्ये भीती निर्माण झाली आहे. या मुलींची व्यवस्था इतर वसतिगृहात करत आहोत.
-अंकुशराव कदम, सचिव, 'एमजीएम'