म. टा. प्रतिनिधी, औरंगाबाद :
पेट्रोल पंपावरून ग्राहकांना योग्य प्रकारे पेट्रोल दिले जाते अथवा नाही याची तपासणी अचानकपणे गुरुवारी वजन मापे विभागाकडून करण्यात आली. या तपासणीत अधिकाऱ्यांना कोणताही गैरप्रकार आढळला नाही.
वजन मापे विभागाचे वैध मापनशास्त्र उपनियंत्रक शशिकांत चालिकवार, मापे निरिक्षक अनुप कुलकर्णी, संतोष अंधरीकर यांनी गारखेडा भागात उल्कानगरी येथे असलेल्या पेट्रोल पंपावर पेट्रोल विक्रीची तपासणी केली. यात पेट्रोल आणि डिजेल पंपाच्या सर्व नोजलवर वैधरित्या इंधन देण्यात येते किंवा नाही याची तपासणी त्यांनी केली. याशिवाय क्रांतीचौक येथील हिंद सुपर पेट्रोल पंपावरही तपासणी करण्यात आली. दोन्ही पेट्रोल पंपावर आक्षेपार्ह अशी कोणतेही बाब आढळली नसल्याची माहिती या अधिकाऱ्यांनी दिली. अशीच तपासणी आगामी काही दिवस सुरू राहणार असल्याचेही त्यांनी सांगितले. यात तपासणी पाच लिटरच्या मापात पेट्रोल टाकून त्याची तपासणी करण्यात आली. शिवाय पंपावर स्टॅपिंग व्यवस्थित आहे किंवा नाही याचीही तपासणी करण्यात आली.
…………