म. टा. प्रतिनिधी, औरंगाबाद
गतीमंद मुलाच्या शोधासाठी हायकोर्टाने स्वतःहून दाखल करून घेतलेल्या सुमोटो फौजदारी याचिकेत न्या. एस. एस. शिंदे व न्या. के. के. सोनवणे यांच्या खंडपीठाने उदगीर येथील निवासी मूकबधीर विद्यालय व पोलिस प्रशासनाला नोटीस बजावली. या प्रकरणात चार जानेवारी २०१९ रोजी पुढील सुनावणी होईल.
कर्नाटकमधील बिदर जिह्यातील औराद तालुक्यामधील हुलसूर (खेड) येथील भानुदास पुंडलिक कांबळे यांनी खंडपीठाला याविषयीचे पत्र लिहिले होते. त्यानुसार, त्यांचा मुलगा दीपक हा गतीमंद असून त्याला उदगीर येथील निवासी मूकबधीर विद्यालयात शिक्षणासाठी पाठविले होते. त्यांच्या गावापासून उदगीरचे अंतर ३० किलोमीटर इतके आहे. सहा महिन्यांपूर्वी त्यांचा मुलगा थेट घरी आला होता. त्यामुळे कांबळे यांनी मूकबधीर विद्यालयाच्या प्रशासनाला जाब विचारला. प्रशासनाने दीपक महाविद्यालयातून न सांगताच गेल्याचे सांगत जबाबदारी झटकली. नंतर असा प्रकार होणार नाही, असे आश्वासन दिले. मात्र, काही दिवसांनी २७ ऑगस्ट २०१८ रोजी महाविद्यालयातून भानुदास कांबळे यांना संपर्क साधण्यात येऊन त्यांचा मुलगा महाविद्यालयात नसल्याची माहिती देण्यात आली. याही वेळेस महाविद्यालयाने जबाबदारी झटकली. त्यामुळे कांबळे यांनी पत्नीसह उदगीर येथील पोलिस ठाणे गाठले व तक्रार दिली. मात्र, पोलिसांनी बेपत्ता दीपकच्या शोधासाठीच काहीच हालचाल न केल्याने कांबळे यांनी हायकोर्टाला पत्र लिहिले. या पत्राआधारे खंडपीठाने सुमोटो फौजदारी याचिका दाखल करून घेत अॅड. चंद्रकांत थोरात यांची न्यायालयाचा मित्र (अॅमिकस क्युरी) म्हणून नियुक्ती केली. अॅड. थोरात यांनी निवासी मूकबधीर महाविद्यालय व पोलिसांच्या हलगर्जीपणाकडे कोर्टाचे लक्ष वेधले आहे. तसेच दीपकच्या शोधासाठी आदेश देण्याची विनंती केली.