म. टा. प्रतिनिधी, औरंगाबाद
पोलिसांच्या तावडीतून स्वत:ची सुटका करून घेण्यासाठी कुख्यात गुन्हेगार तथा सुपारी किलर इम्रान मेहंदी याने कट रचल्याप्रकरणात पोलिसांनी आरोपी इम्रान मेंहदी याला शुक्रवारी सायंकाळी पुणे येथील येरवडा जेलमधून ताब्यात घेत अटक केली. त्याला शनिवारी न्यायालयात हजर करण्यात आले सोमवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी आय. के. सूर्यवंशी यांनी शनिवारी दिले.
या प्रकरणात आतापर्यंत पोलिसांनी एकूण १६ आरोपींना अटक केली असून, ते सध्या न्यायालयीन कोठडीत आहेत. तसेच प्रकरणात १५ आरोपीविरुद्ध न्यायालयात दोषारोपपत्र देखील दाखल करण्यात आले आहे. सुपारी किलर इम्रान मेहंदीचे जामिनावर सुटलेले साथीदार हबीब खालेद हबीब मोहंमद उर्फ खालेद चाऊस आणि मोहंमद शोएब मोहंमद सादेक हे कट रचवून इम्रान मेहंदीला पोलिस संरक्षणातून पळवून नेणार असल्याची माहिती गुन्हे शाखेला मिळाली होती. याआधारे २७ ऑगस्ट २०१८रोजी गुन्हे शाखा पोलिसांनी नारेगाव चौकात सापळा रचून दहा जणांना पकडले. त्यांच्याकडून एक पिस्तूल, काडतुसे, दोन कार आणि मोबाइल देखील यावेळी जप्त करण्यात आले. तसेच यातील एकाने गुन्हे शाखेच्या उपनिरीक्षकावर पिस्तूल रोखले होते. या प्रकरणात पोलिस उपनिरीक्षक अमोल देशमुख यांच्या तक्रारीवरून एमआयडीसी सिडको पोलिस ठाण्यात गुन्हा दाखल करण्यात आला. या प्रकरणात यापूर्वी पोलिसांनी १६ आरोपींना अटक केली. तर न्यायालयाने पोलिस कोठडी नंतर त्यांची रवानगी न्यायालयीन कोठडीत केली.
\Bकटात कोण?
\Bपोलिसांनी सदर गुन्ह्यात आरोपी इम्रान मेहंदी याला शनिवारी न्यायालयात हजर केले. आरोपी इम्रान याने साथीदारांच्या मदतीने स्वत: च्या सुटकेचा कट रचल्याचे पोलिसांच्या तपासात समोर आले आहे. त्यामुळे आरोपीने गुन्ह्याचा कट कसा रचला व त्यामध्ये आणखी कोणाचा समावेश आहे. त्यांना कोणी मदत केली याबाबत तपास करणे असल्याने आरोपीला पाच दिवस पोलिस कोठडी देण्याची विनंती सहाय्यक सरकारी वकील सूर्यकांत सोनटक्के यांनी न्यायालयाकडे केली. ही विनंती न्यायालयाने मान्य करताना दोन दिवसाची कोठडी सुनावली.