एसयुव्ही महाग; लक्झरी स्वस्त

एसयुव्ही महाग; लक्झरी स्वस्त

जीएसटीचा वाहनबाजारावर परिणाम; दुचाकी दीड हजाराने स्वस्त

म. टा. प्रतिनिधी, औरंगाबाद ः

मर्सडिज बेंझ, बीएमडब्‍ल्यु, इनोव्हा, ऑडी अशी लक्झरी कार तुम्हाला खरेदी करायची असेल तर हीच योग्य वेळ आहे. कारण जीएसटीने लक्झरी कारच्या किमती एकदम दोन ते पाच लाख रुपयांपर्यंत कमी केल्या आहेत. एसयुव्ही वाहनांच्या किमती मात्र वाढलेल्या आहेत. दुचाकी वाहनांच्या किंमतीही आठशे ते दीड हजार रुपयांपर्यंत कमी झाल्या आहेत.

एक जुलै रोजी जीएसटी लागू झाल्यानंतर गाड्यांच्या विविध प्रकारात वाहनांच्या किंमतीवर परिणाम झाला आहे. जीएसटी लागू झाल्यानंतर ज्या गाड्यांच्या किमतीत वाढ झाली आहे, त्यामुळे डीलर्सला त्याचा फायदा होत आहे. तर स्वस्त झालेल्या काही कारमुळे नुकसानही सहन करावे लागत आहे. २५० सीसीपर्यंतच्या दुचाकी वाहनांच्या किंमतीत ८०० ते १५०० रुपयांनी कमी झालेल्या आहेत. मात्र, ३५० सीसीपेक्षा जास्त असलेल्या दुचाकी वाहनांच्या किंमती २ ते ३ हजारांनी महागल्या आहेत. याशिवाय एक्सयुव्ही तसेच टीयुव्ही प्रकारात मोडणाऱ्या कारच्या किंमतीतही वाढ झाली आहे. मध्यमवर्गीयांसाठी असलेल्या गाड्यांच्या किंमती कमी झाल्या होत्या. मात्र, राज्य शासनाने टोल टॅक्स बंद करून दोन टक्के रोड टॅक्स वाढविल्याने या वाहनांच्या किंमती पूर्वीप्रमाणेच स्थिर आहेत.

आकडे वारीची चौकट

दुचाकी वाहन १०० सीसी ते २५० सीसी - आठ ते दीड हजारपर्यंत दर कमी

दुचाकी वाहन २५० सीसी ते ३५० सीसी - दर स्थिर

दुचाकी वाहन ३५० सिसी ते ५०० सिसी - दोन ते अडीच हजार महागले



जीएसटीनंतर असा आहे टॅक्सचा दर

वाहनांचा प्रकार जीएसटी सेस

छोटया आकाराच्या चार चाकी (पेट्रोल) २८टक्के १ टक्के

छोटया आकाराच्या चार चाकी (डिझेल) २८ टक्के ३ टक्के

मध्यम आकाराच्या चार चाकी २८ टक्के १५ टक्के

लक्झरी कार २८ टक्के १५ टक्के

एसयुव्ही २८ टक्के १५ टक्के

हायब्रिड २८ टक्के १५ टक्के

इलेक्ट्रीक कार १२ टक्के ० टक्के

महाराष्ट्रात रोड टॅक्स दोन टक्के वाढल्याने मध्यम आकाराच्या गाड्यांच्या किंमती जशास तशा आहे. मात्र, एसयुव्हीच्या किंमतीत वाढ झालेली आहे.