म. टा. प्रतिनिधी, औरंगाबाद
एक आनंदवार्ता. येत्या दहा वर्षांत तब्बल १४५ कोटी चार लाख रुपये खर्चून मिटमिटा येथे महापालिका भव्यदिव्य सफारी पार्क उभारणार आहे. या पार्कमध्ये ६० प्रजातींच्या पाचशे प्राण्यांसाठी प्राणिसंग्रहालय असेल, अशी माहिती मंगळवारी झालेल्या सविस्तर प्रकल्प अहवाल (डीपीआर) सादरीकरणातून देण्यात आली.
मिटमिटा शिवारात सुमारे शंभर एकर जागेत सफारी पार्क विकसित केले जाणार आहे. या पार्कचा 'डीपीआर' तयार करण्याचे काम पालिकेने दिल्ली येथील ब्रिजराज शर्मा यांना दिले आहे. शर्मा यांनी आज पालिकेच्या मुख्य सभागृहात शर्मा 'डीपीआर'चे सादरीकरण केले. यावेळी महापौर नंदकुमार घोडेले, सभागृहनेते विकास जैन, आयुक्त डॉ. निपुण विनायक यांच्यासह अन्य पदाधिकारी, नगरसेवक, अधिकारी उपस्थित होते. 'डीपीआर' सादरीकरण करताना शर्मा यांनी सिद्धार्थ उद्यानात अस्तित्वात असलेल्या प्राणिसंग्रहालयाचा आढावा घेतला. ते म्हणाले, 'मिटमिटा येथे होणारे सफारी पार्क औरंगाबादच्या वैभवात भर पाडणारे असेल. जैवविवधता म्हणजे काय, हे या सफारी पार्कच्या माध्यमातून ठळकपणे लक्षात येईल. अजिंठा - वेरुळ पाहण्यासाठी येणाऱ्या पर्यटकांना सफारी पार्क पाहण्यासाठी औरंगाबादेत एक दिवस जास्त थांबावे लागेल. त्यामुळे औरंगाबादचे अर्थकारण वाढेल. सफारी पार्कमध्ये साठ प्रजातींचे पाचशे प्राणी असतील. त्यांची रचना देखील वैशिष्ट्यपूर्ण करण्यात येणार आहे. मांसाहारी प्राण्यांचे पिंजरे सफारी पार्कच्या एका बाजूला, तर शाकाहारी प्राण्यांचे पिंजरे दुसऱ्या बाजूला असणार आहेत. सफारी पार्कमध्ये चार रस्ते असतील. तीन रस्ते पर्यटकांसाठी तर एक रस्ता सफारी पार्कसाठीच्या अधिकारी - कर्मचाऱ्यांसाठी असेल.'
\Bप्राण्यांचे आगर
\B- ६० प्रजातींचे ५०० प्राणी
- ४० टक्के प्राणी मराठवाड्यातील
- ४० टक्के प्राणी अन्य राज्यातील
- १० टक्के प्राणी विदेशातील
- ३७ प्रकारचे मासे अक्वेरियममध्ये
- ८.५ एकर जागा हत्तींसाठी
- ६ वर्षांत प्रमुख प्राण्यांचे पिंजरे करणार
- सिद्धार्थमधील प्राण्यांचे स्थलांतर
\Bअशी असेल सुविधा
\B-२.५ कोटी देखभाल दुरुस्तीसाठी
- ४ कोटींचे वार्षिक उत्पन्न गृहित
- २० लाख पर्यटक वर्षात देतील भेट
- २.५ एकर भागात नर्सरी असेल
- ३.५ हेक्टर क्षेत्रात पार्किंग
- २०० चार चाकी वाहनांची सोय
- ३५० दुचाकी वाहने उभा राहणार
- २० बसच्या पार्किंगची सुविधा
\Bअसे असेल आकर्षण
\B- बिबट्यांसाठी सुटका केंद्र
- सर्व प्राण्यांसाठी खुले पिंजरे
- पक्ष्यांसाठी बंदीस्त पिंजरे
- प्राण्यांच्या पिंजऱ्याला काचेचा पडदा
- ओपन थिएटरची व्यवस्था
- फूड प्लाझा, मुलांसाठी स्वतंत्र पार्क
- जलकुंभ, त्यावर टेहळणी मनोरा
- प्राण्यांसाठी अद्ययावत रुग्णालय