म. टा. प्रतिनिधी, वैजापूर
रॉयल्टी भरूनही पोलिसांनी वाळूचे वाहन पकडून चोरीचा गुन्हा दाखल केला असून, गेल्या २० दिवसांपासून हे वाहन पोलिस ठाण्यासमोर उभे आहे. त्यामुळे माझे दीड ते दोन लाख रुपयांचे नुकसान झाले आहे. वाहन सोडण्यासाठी पोलिस नाईक भरत चव्हाण हे पैशाची मागती करत आहेत. त्यामूळे आत्महत्या केल्याशिवाय पर्याय नाही, असा इशारा कन्नड तालुक्यातील देवळी येथील पवन राजगोपाल दरक यांनी जिल्हाधिकारी यांना दिलेल्या निवेदनात दिला आहे.
वैजापूर पोलिसांनी २९ मे रोजी नागपूर-मुंबई महामार्गावर दहेगाव येथे एक ब्रास वाळू घेऊन जाणारा विनापासिंगचा टेम्पो पकडला. चालक संजय शिवलाल शिहरे (रा. देवळी) याच्याविरुद्ध चोरी व मोटर व्हेइकल अॅक्टनुसार गुन्हा दाखल केला होता. तेव्हापासून वाळूचा हा टेम्पो ठाण्याच्या आवारात उभा आहे. शिहरे हा शिवना नदीच्या वाळूपट्ट्यातील देवळी येथील लिलावधारक किरण अशोक चव्हाण यांच्या गटमधून एक ब्रास वाळूचा उपसा करून वाहतूक करत होता. जिल्हा खानिकर्म अधिकारी यांनी रवी वाघ यांच्या नावाने वाळू उपसा करण्यासाठी पावती पुस्तक निर्गमित केल्याचा अहवालही दिला आहे. या अहवालानुसार शिहरे यांच्याकडे असलेले पावतीपुस्तक हे देवळी येथील वाळूपट्ट्याचेच असून, हा परवाना खरा असल्याचे स्पष्ट झाले आहे. असे असताना पोलिस नाईक भरत चव्हाण यांनी पैशांची मागणी करत वाळूचे वाहन ठाण्यात उभे केले आहे. त्यामुळे पैशाची मागणी करणाऱ्या पोलिस कर्मचाऱ्यावर कारवाई करावी व वाहन सोडावे, अशी मागणी वाहनाचे मालक दरक यांनी जिल्हाधिकारी यांना पाठवलेल्या निवेदनात केली आहे. त्यांनी आत्महत्या करण्याचा इशाराही निवेदनात देण्यात आला आहे.
दरम्यान, याप्रकाराबाबत वैजापूर पोलिस ठाण्याचे प्रभारी पोलिस निरीक्षक व सहायक पोलिस अधीक्षक सोमय मुंढे यांच्याशी संपर्क केला असता त्यांनी पासिंग नसलेले वाहन रस्त्यावर आणणे हाही गुन्हा आहे. शिवाय वाहतूक परवाना रवी वाघ यांच्या नावावर असताना दुसरी व्यक्ती वाळूची वाहतूक करत असेल, तर ती चोरी ठरते. त्यामुळे ही कारवाई करण्यात आली असे सांगितले.
रॉयल्टीची पावती दुसऱ्याच्या नावावर असल्यामुळे नियमानुसार कारवाई केली आहे. गुन्हा दाखल केल्याचा राग धरून त्यांनी तक्रार केली आहे. पैसे मागितल्याच्या आरोपात तथ्य नाही.
- भरत चव्हाण, पोलिस नाईक, वैजापूर
आरोपांची चौकशी करणार
पोलिस नाईक भरत चव्हाण यांनी वाहन सोडण्यासाठी पैसे मागितल्याच्या आरोपाची चौकशी करण्यासाठी सहायक निरीक्षक यांची नेमणूक करण्यात आली आहे. त्यांचा अहवाल प्राप्त झाल्यानंतर कारवाई करण्यात येणार आहे, असे सहायक पोलिस अधीक्षक सोमय मुंढे यांनी सांगितले.