‘थर्मलगन’साठी प्रशासनाने व्यापाऱ्यांना संधी द्यावी

म. टा. प्रतिनिधी, औरंगाबाद

शहरातील बहुतांशी मोठ्या दालनांत 'थर्मलगन'द्वारे तपासणी केली जात आहे, परंतु सर्वच व्यापाऱ्यांना हे मशीन घेणे परवडणारे नाही. त्यामुळे सक्ती व दंडात्मक कारवाई न करता त्यांना संधी देण्यात यावी, अशी मागणी जिल्हा व्यापारी महासंघाने केली आहे.

करोना विषाणूचा वाढता प्रादुर्भाव लक्षात घेता महापालिका प्रशासनाने 'थर्मलगन' नसणाऱ्या दुकानदारांविरोधात कारवाईचा बडगा उगारला आहे. यासंदर्भात महासंघाचे अध्यक्ष जगन्नाथ काळे, सचिव लक्ष्मीनारायण राठी यांनी 'मटा'शी संवाद साधला. 'करोना'च्या पार्श्वभूमीवर प्रशासनाने घेतलेल्या विविध निर्णय, उपाययोजनांसंदर्भात व्यापाऱ्यांनी नेहमीच सहकार्याची भूमिका घेतली आहे. 'लॉकडाऊन' त्यानंतर 'जनता कफ्यू'मध्येही व्यापाऱ्यांनी पुढाकार घेऊन दुकाने बंद ठेवली होती. प्रशासनाने दिलेल्या सूचनांप्रमाणे शहरातील बहुतांशी व्यापारी प्रतिष्ठाणे, मोठ्या दालनांत 'थर्मलगन'सह अन्य दक्षता घेतली जात आहे, असे त्यांनी सांगितले.

दरम्यान, 'करोना'च्या या संकटाकाळात व्यापारीवर्गाचे मोठे नुकसान झाले आहे. अनेकांचे आर्थिक गणिते बिघडली आहे. सर्वसामान्य व्यापारी, विक्रेते, छोट्या दुकानदारास आर्थिक अडचणींचा सामना करावा लागत आहे. अशा परिस्थितीत 'थर्मलगन' घेणे त्यांना परवडणारे नाही. त्यामुळे अशा दुकानदारांवर थेट दंडात्मक कारवाई करू नये. त्यांना संधी देण्यात यावी, अशी विनंती अध्यक्ष काळे व सचिव राठी यांनी करून, याप्रश्नी लवकरच महापालिका आयुक्तांची भेट घेणार असल्याचेही सांगितले.