म. टा. प्रतिनिधी, औरंगाबाद
सात वर्षांच्या मुलादेखत त्याच्या आईवर रॉकेल टाकून तिला जाळून टाकणाऱ्या मुलाच्या पित्याला अर्थात आरोपी पती साळुजी यादव मगरे याला जन्मठेप व दहा हजारांच्या दंडाची शिक्षा जिल्हा व अतिरिक्त सत्र न्यायाधीश एस. एस. भिष्मा यांनी बुधवारी (१४ नोव्हेंबर) ठोठावली.
याप्रकरणी मृत निर्मला साळुजी मगरे (३०, रा. सातारा) यांनी फिर्याद दिली होती. फिर्यादीनुसार, फिर्यादीचे लग्न आरोपी साळुजी यादव मगरे (३१, रा. सातारा) याच्याशी २००७मध्ये झाले होते. त्यांना दोन मुले व एक मुलगी आहे. दरम्यान, आरोपी साळुजी याला दारुचे व्यसन होते व तो दारुच्या नशेत फिर्यादी पत्नीला नेहमी शिविगाळ तसेच मारहाण करीत होता. १४ जानेवारी २०१५ रोजी सायंकाळी सातच्या सुमारास फिर्यादी ही विद्यापीठ परिसरातील नामविस्तार दिनाच्या कार्यक्रमाहून घरी परतली असता, आरोपी हा दारू पिऊन आला आणि 'जेवण करायचे नाही,' असे म्हणत त्याने फिर्यादीला शिविगाळ केली. रात्री दहाच्या सुमारास संतप्त आरोपीने तिला पुन्हा शिविगाळ केली आणि फिर्यादीच्या डोक्यात लाथ मारली असता फिर्यादीनेही आरोपीला चापट मारली. त्यानंतर 'मला शिळे अन्न खायला देते,' असे म्हणत आरोपीने तिच्या अंगावर रॉकेल टाकून तिला पेटवून दिले आणि स्वतः घराबाहेर पळून गेला. फिर्यादी पेटत्या अवस्थेत बाहेर पडली असता शेजारींनी तिच्या अंगावर गोधडी टाकून आग विझवली.
त्यानंतर ६१ टक्के जळालेल्या अवस्थेत फिर्यादीला घाटीमध्ये दाखल करण्यात आले. उपचारादरम्यान १२ फेब्रुवारी २०१५ रोजी फिर्यादीचा मृत्यू झाला. हा संपूर्ण घटनाक्रम पियूष या फिर्यादी व आरोपीच्या सात वर्षांच्या मुलासमोर घडला. घटनेवेळी पियुष हा घरामध्ये टीव्ही पाहात होता आणि त्याच्यासमोरच ही घटना घडली. या प्रकरणी फिर्यादीच्या तक्रारीवरुन आधी भारतीय दंड संहितेच्या ३०७, ४९८ (अ), ३२३, ५०४, ३४ कलमान्वये सातारा पोलिस ठाण्यात गुन्हा दाखल करण्यात आला होता, तर फिर्यादीच्या मृत्युनंतर गुन्ह्याच्या प्रकरणात ३०७ कलम दाखल करण्यात आले होते. या प्रकरणात पोलिसांसह विशेष न्यायदंडाधिकारी यांनी फिर्यादीचा मृत्युपूर्व जबाब नोंदविला. पोलिस उपनिरीक्षक टी. एम. देवरे यांनी तपास केला, तर पोलिस उपनिरीक्षक एम. एस. शेख यांनी कोर्टात दोषारोपपत्र दाखल केले. खटल्यावेळी, सहाय्यक सरकारी वकील मधुकर आहेर यांनी नऊ साक्षीदारांचे जबाब नोंदविले. यामध्ये पियूष याच्यासह सहाय्यक पोलिस निरीक्षक सय्यद हनीफ, विशेष न्यायदंडाधिकारी लक्ष्मण शिरोडे, घाटीतील डॉ. बाबासाहेब ढाकणे, शेजारी आकाश गढवे यांची साक्ष महत्त्वाची ठरली.
\Bदंड न भरल्यास तीन वर्षे सक्तमजुरी\B
दोन्ही बाजुंच्या युक्तिवादानंतर व साक्ष-पुराव्यांवरुन कोर्टाने आरोपी साळुजी याला भारतीय दंड संहितेच्या ३०२ कलमान्वये जन्मठेप व दहा हजार रुपये दंड व दंड न भरल्यास तीन वर्षे अतिरिक्त सक्तमजुरीची शिक्षा ठोठावली; तसेच सबळ पुराव्याअभावी आरोपी सासू विमलबाई यादव मगरे (६५) हिला कोर्टाने मुक्त केले. पैरवी अधिकारी म्हणून हवालदार रेवती पवार यांनी काम पाहिले.