म. टा. प्रतिनिधी, सिल्लोड
मालेगावला जाणाऱ्या बसला समोरून येणाऱ्या वाहनाने हुलकावणी दिल्याने चालकाचा ताबा सुटला व बस रस्त्याच्याकडेला टाकलेल्या मुरुमाच्या भरावात घसरून रुतल्याने एका बाजुला झुकली. बस बराशीत उलटली नाही त्यामुळे मोठी दुर्घटना टळली. ही घटना शनिवारी सकाळी साडेआठच्या सुमारास सिल्लोड-कन्नड रस्त्यावर बोरगावबाजार जवळ घडली.
याबाबत अधिक माहिती अशी की, सिल्लोड आगाराची बस (एमएच १४, बीटी १९६३) मालेगावला जात असताना बोरगाव बाजारजवळ समोरून येणाऱ्या वाहनाने हुलकावणी दिली. त्यामुळे बस रस्त्याच्या कडेला टाकलेल्या मुरुमाच्या भरावात घसरून रुतली. या रस्त्याचे काम सुरू असल्याने रस्ता खोदलेले आहे. शिवाय रस्त्यालगत मुरुमाचा भराव टाकण्याचे काम सुरू आहे. समोरून येणाऱ्या वाहनाने हुलकावणी दिल्याने चालक कृष्णा भोसले यांचा ताबा सुटला व बस मुरुमात घसरून रुतली. बस आणखी थोडी पुढे गेली असती तर, शेतातील बराशीत उलटून मोठा अपघात घडला असता, असे प्रत्यक्षदर्शीनी सांगितले.
या अपघातानंतर बस उजव्या बाजुला झुकल्याने प्रवासी घाबरले होते. शेजारील नागरिक तत्काळ मदतीला धावले व प्रवाशांना बसमधून सुखरुप खाली उतरवले. यावेळी बसमध्ये ५० प्रवाशी होते, असे बसचे वाहक आर. बी. पवार यांनी सांगितले. यानंतर रस्त्याच्या कामावरील पोकलेनेच्या मदतीने बस काढण्यात आली.
चालकाचा प्रसगांधावनाने अपघात टळला
सध्या या रस्त्याचे काम सुरू असून मुरुमाचा भराव टाकणे सुरू आहे. यामुळे रस्त्याची उंची पूर्वीपेक्षा वाढली आहे. समोरील वाहनाने हुलकावणी देताच चालकाचा ताबा सुटला व बस मुरुमाच्या भरावात घसरली. बसपुढे बराशीत खाली उतरण्याअगोदर चालकाने प्रसगांधावना राखत वेळीच ताबा मिळवल्याने मोठा अपघात टळला.