\Bम. टा. प्रतिनिधी, औरंगाबाद\B
करोनाचा मुकाबला करण्यासाठी आवश्यक ती औषधी खरेदी करण्यासाठी व रुग्णालयांसाठी उपकरणे खरेदी करण्यासाठी महापालिकेला शासनाकडून साडेचार कोटी रुपयांचे अर्थसहाय्य करण्यात आले आहे. त्याशिवाय शासनाच्या नाविण्यपूर्ण योजनेतून महापालिकेला अत्याधुनिक रुग्णवाहिका देखील मिळणार आहे.
महापालिकेच्या वैद्यकीय अधिकारी डॉ. नीता पाडळकर म्हणाल्या, शासनाची साडेचार कोटींची मदत पालिकेत जमा झाली आहे. या निधीतून महापालिकेच्या रुग्णालयांसाठी अत्यावश्यक उपकरणे खरेदी केली जाणार आहेत. त्यात व्हेंटिलेटर्स, मॉनीटर्स, ऑक्सिजन सिलेंडर्स, औषधींचा समावेश असणार आहे. व्हेंटीलेटर्स उपलब्ध नसल्यामुळे ते सध्या प्राप्त होणार नाहीत, पण अन्य उपकरणे मात्र खरेदी केली जाणार आहेत, अशी माहिती त्यांनी दिली. हाफकीन या शासनाच्या संस्थेकडून उपकरणांसह औषधींची खरेदी करण्याचे नियोजन करण्यात आले होते, पण हाफकीनकडून हे सर्व मिळण्यास विलंब लागण्याची शक्यता आहे. कारण त्यांच्याकडे अगोदरच मोठ्या प्रमाणावर मागणीची नोंद झाली आहे. ही बाब जिल्हाप्रशासनाच्या लक्षात आणून दिल्यावर तुम्ही तुमच्या स्तरावर खरेदी करा असे आदेश देण्यात आले आहेत. त्यादृष्टीने आयुक्तांच्या मार्गदर्शनाखाली खरेदीची प्रक्रिया केली जाणार आहे, असे डॉ. पाडळकर म्हणाल्या. जिल्हाप्रशासनाने नावीण्यपूर्ण योजनेतून रुग्णवाहिका खरेदी करण्यासाठी महापालिकेला ३५ लाख रुपये देण्याची तयारी दाखवली आहे. या निधीतून अत्याधुनिक रुग्णवाहिका खरेदी केली जाईल असे त्यांनी स्पष्ट केले.