म. टा. प्रतिनिधी, सातारा
बीड बायपास परिसरातील श्री हरिहर सद्गुरू शक्तिपीठ रेणुकामाता मंदिरात गुरूपौर्णिमेनिमित्त भाविकांच्या गर्दीचा जनसागर उसळला. यावेळी महाराष्ट्र व बाहेरच्या राज्यातून आलेल्या हजारो भाविकांनी सद्गुरू योगिराज हंसतीर्थ उर्फ अप्पा महाराज यांच्या पादुकांचे, अप्पा महाराजांचे श्रद्धापूर्वक दर्शन घेतले.
अंबरीश महाराज यांच्या नियोजनाखाली गेल्या तीन दिवसांपासून हे कार्यक्रम सुरू होते. मंगळवारी पहाटे सहा वाजता गुरूपौर्णिमेनिमित्त आयोजित मुख्य विधीस प्रारंभ करण्यात आला. प्रारंभी अप्पा महाराजांनी भाविकांना मार्गदर्शन करताना गुरूचे जीवनातील स्थान, सद्गुरू अण्णा महाराजांच्या कार्यावर प्रकाश टाकला. यानंतर साडेदहावाजता नयनरम्यपद्धतीने फुलांनी सुशोभित व्यासपीठाचे पूजन करण्यात आले.
शक्तिपीठ, रेणुकामाता महात्म्य; तसेच योगिराज हंसतीर्थ स्वामी जन्मशताब्दीनिमित्त स्मरणिकेचा प्रकाशन सोहळा संतमहात्मे व मान्यवरांच्या उपस्थितीत झाला. यानंतर आयोजित महाप्रसादाचा भाविकांनी लाभ घेतला. गुरूपोर्णिमा महोत्सवानिमित्त वृक्षारोपण, गरजू विद्यार्थ्यांना शालेय साहित्य वाटप, 'बेटी बचाव बेटी पढाओ', 'पाणी अडवा, पाणी जिरवा' आदी विधायक उपक्रमही राबविण्यात येत असल्याची माहिती विश्वस्तांनी दिली.
\Bभजन, दिंडीने माऊलीचा गजर\B
शक्तिपीठातील शक्तीदंड पूजनानंतर लघुरूद्राभिषेक, तुलसीअर्चन, सामुदायिक पादुकापूजन करण्यात आले, भजनी मंडळांच्यावतीने एकापेक्षा एक सरस भजनाचे सादरीकरण करण्यात आले. मंदिर परिसरातून निघालेल्या दिंडीत नऊवारी नेसलेल्या सुवासिनी, पुरूष भाविकांनी रेणुकामाता, योगिराज हंसतीर्थ उर्फ अप्पा महाराजांचा वाजतगाजत गजर केला.