म. टा. प्रतिनिधी, औरंगाबाद
महापालिकेच्या सिद्धार्थ उद्यान प्राणिसंग्रहालयातील नाझिया या मादी बिबट्याचा गुरुवारी (१२ सप्टेंबर) रात्री आजाराने मृत्यू झाला. तिच्यावर शुक्रवारी दुपारी अंत्यसंस्कार करण्यात आले.
मुंबई येथील बोरिवलीच्या संजय गाधी नॅशनल पार्कमधून ३१ मार्च २००९ रोजी नाझिया बिबट्याला सिद्धार्थ उद्यान प्राणिसंग्रहालयात आणण्यात आले होते. त्यावेळी ती तीन वर्षांची होती. उद्यानात बिबट्या वर्गातील ती एकमेव होती. गेल्या सहा दिवसांपासून आजारी असल्याने प्राणीसंग्रहालयाचे पशुवैद्यक डॉ. नीती सिंग या तिच्यावर उपचार करत होत्या. तिला मूत्रपिंडाचा विकार झाला होता. वयोमानानुसार उपचारास प्रतिसाद मिळत नव्हता. गुरुवारी रात्री साडेआठ वाजता तिचा मृत्यू झाला. शुक्रवारी सकाळी साडेदहा वाजता महापौर नंदकुमार घोडेले यांनी प्राणिसंग्रहालयास भेट दिली आणि माहिती घेतली. पशुसंवर्धन विभागाचे सहायक आयुक्त डॉ. वल्लभ जोशी, पशुधन विकास अधिकारी डॉ. आश्विनी यांनी तिचे शवविच्छेदन केले. व्हिसेरा काढण्यात आला असून नमुने प्रयोग शाळेत तपासणीसाठी पाठविण्यात आले. त्यानंतर मादी बिबट्यावर अंत्यसस्कार करण्यात आले. वन विभागाचे अधिकारी एस. बी. तांबे, प्राणिसंग्रहालयाचे संचालक डॉ. भगवान नाईकवाडे, नंदन आदींसह कर्मचारी उपस्थित होते.