(मोठी सिंगल)
म. टा. प्रतिनिधी, औरंगाबाद
महापालिका निवडणुकीचे पडघम वाजण्यास सुरुवात झाली आहे. आगामी महापौरपदाच्या आरक्षणासाठी शासनाने महापालिकेकडून माहिती मागविली आहे. येत्या दोन महिन्यांत महापौरपदाच्या आरक्षणाची सोडत निघण्याची शक्यता वर्तविली जात आहे.
महापालिकेची निवडणूक मार्च महिन्यात किंवा एप्रिल महिन्याच्या पहिल्या आठवड्यात होणार आहे. नवीन महापौरांची निवड २९ एप्रिल रोजी होणार आहे. त्यासाठी शासनाने आतापासून तयारी सुरू केली आहे. या संदर्भात राज्य शासनाच्या नगर विकास विभागाने महापालिका आयुक्तांच्या नावे पत्र पाठवले आहे. पत्रात म्हटले आहे की, महापौर पदाच्या आरक्षण निश्चितीच्या अनुषंगाने महापालिकेची अचूक व परिपूर्ण माहिती सात ऑगस्टपर्यंत ईमेलवर पाठविण्यात यावी आणि मूळ प्रत देखील उपलब्ध करून देण्यात यावी. शासनाने मागवलेल्या माहितीत २००१ पासून आतापर्यंत महापौर पदासाठी निश्चित झालेल्या आरक्षणाचा प्रवर्ग, आरक्षण निश्चितीच्या अधिसूचनेचा दिनांक, आरक्षणाचा कालावधी, महापौरपदी कार्यरत असलेल्या व्यक्तीचे नाव व कालावधी, सध्या सुरू असलेल्या महापौरपदाच्या आरक्षणाचा प्रवर्ग व कालावधी संपण्याचा दिनांक, २०११ च्या जनगणनेनुसार महापालिकेच्या लोकसंख्येबाबतची माहिती असा तपशील महापालिकेस शासनाकडे पाठवावा लागणार आहे.
मिळालेल्या माहितीनुसार औरंगाबाद महापालिकेत महापौरपदासाठी आतापर्यंत एससी प्रवर्गाचे आरक्षण निघाले नाही. त्यामुळे यावेळी एससी प्रवर्गाचे आरक्षण महापौरपदासाठी असण्याची दाट शक्यता आहे.