रेल्वे अंगावरून जाऊनही ज्येष्ठाचे प्राण वाचले

म. टा.प्रतिनिधी, औरंगाबादः रागाच्या भरात रेल्वे रुळांवर झोपलेल्या एका वृद्ध नागरिकाचे नशीब बलवत्तर असल्याने त्यांचे प्राण वाचले. रेल्वे त्यांच्या अंगावरून गेली. मात्र, दोन रुळांच्या मधोमध ते झोपले असल्याने त्यांना कोणतीही इजा झाली नाही. मुकुंदवाडी रेल्वे स्टेशन जवळ हा प्रकार घडला. या घटनेतील ७२ वर्षीय वृद्धाला व्यक्तीला सुखरूप बाहेर काढण्यात आले.

घरातून रागाच्या भरात बाहेर पडलेले हे ग्रहस्थ निवृत्त अभियंता असून त्यांची पत्नीचे निधन झाल्यानंतर त्यांचे मानसिक संतुलन बिघडले. त्यांना नीट बोलता येत नाही. स्मृतीभ्रंशचाही आजार त्यांना आहे. बुधवारी (चार सप्टेंबर) रोजी सकाळी सहा ते सात वाजेच्या दरम्यान घरातून वॉकिंगसाठी बाहेर पडले. वॉकिंगहून आल्यानंतर त्यांच्या घराचा दरवाजा आतून कोणीही उघडला नाही. म्हणून त्यांनी मनात राग धरला. आणि रेल्वे ट्रॅकवर जीव देण्यासाठी गेले आणि ते दोन्ही रेल्वे रुळांमध्ये मधोमध झोपले. त्यामुळे नांदेड-नगरसोल रेल्वेचे तीन ते चार डब्बे अंगावरून गेल्यानंतरही त्यांचे प्राण वाचले. तातडीने त्यांना बाहेर काढण्यात आले. त्यांची विचारपूस केली तेव्हा त्यांना स्वत:बद्दल काहीही बोलता आले नाही.

या वयोवृद्ध व्यक्तीला समजविण्यासाठी विशेष पोलिस अधिकारी श्रीमंत गोर्डे पाटील आणि किरण जोशी यांना बोलाविण्यात आले. या दोघांनी त्या व्यक्तिस समजावले. या बाबांना कोणत्याही प्रकारची माहिती नीट न देता आल्याने त्यांना पुंडलिकनगर पोलिस ठाण्यात नेले. या ठिकाणी पोलिसांसोबत चर्चा करीत असताना पोलिस ठाण्यात या वयोवृद्ध बाबांचा मुलगाही बाबा हरविल्याची तक्रार देण्यासाठी आला होता. आपल्या बाबांना पाहून त्याच्या डोळ्यात अश्रू आले. त्यांनी आपल्या बाबांविषयी पोलिसांनाही माहिती दिली. आपल्या बाबांना घेऊन तो घरी निघून गेला.