म. टा. प्रतिनिधी, औरंगाबाद
एमजीएम परिसरातून ट्रॅव्हल्स बस चोरीला जाण्याची घटना तीन दिवसांपूर्वी घडली होती. ही बस नाशिक स्थानिक गुन्हे शाखेने जप्त केली असून, एका आरोपीला अटक केली आहे. ही बस शनिवारी व आरोपीला सिडको पोलिसांच्या स्वाधीन केले आहे.
बायजीपुरा येथील सय्यद हबीब सय्यद हुसैन यांची ट्रॅव्हल्स बस एमजीएम परिसरातून चोरीला गेली होती. याप्रकरणी शुक्रवारी सिडको पोलिस ठाण्यात गुन्हा दाखल करण्यात आला आहे. दरम्यान गुरुवारी रात्री ही बस नांदगाव ते मालेगावमार्गे धुळ्याकडे जात असल्याची माहिती स्थानिक गुन्हे शाखेला मिळाली होती. या माहितीवरून पोलिस निरीक्षक अशोक करपे यांनी महामार्ग पोलिसांच्या मदतीने मुंबई-आग्रा रोडवरील चाळीसगाव चौफुलीवर सापळा रचला. संशयित ट्रॅव्हल्स बस आल्यानंतर तिला थांबण्याचा इशारा करण्यात आला. चालकाला संशय आल्याने त्याने बस पुढे पळवली. त्याचा पाठलाग करून चिखल ओहळ शिवारात या बसला गाठण्यात आले. चालक शेख अनिस शेख युसूफ (वय २५, रा. कवडगाव, ता.पैठण) याला ताब्यात घेण्यात आले. अधिक चौकशीत चालक अनिसने ही बस औरंगाबादेतून चोरल्याची कबुली दिली. बससह आरोपी शेख अनिसला सिडको पोलिसांच्या ताब्यात देण्यात आले आहे.