म. टा. प्रतिनिधी, औरंगाबाद
दुष्काळी मराठवाड्यावर कृत्रिम पावसाची बरसात करण्यासाठी सुरू केलेल्या कृत्रिम पावसाचे विमान परत पाठवण्यात आले असून लवकरच विभागीय आयुक्त कार्यालयामध्ये असलेली कंट्रोल रुम बंद करणार असून कार्यालयावर लावण्यात आलेले सी-बॅण्ड डॉप्लर रडारही लवकरच काढून घेण्यात येणार आहे.
मराठवाड्यासह विदर्भ, पश्चिम महाराष्ट्र व उत्तर महाराष्ट्रात गेल्या तीन महिन्यांपासून कृत्रिम पावसाचे प्रयोग करण्यात आले होते. ऑक्टोबर महिन्यात झालेल्या दमदार पावसामुळे शेतीपिकांचे मोठे नुकसान झाल्यानंतर हा प्रयोग बंद करण्यात आला होता. त्यानंतर कंपनीचे काही शास्त्रज्ञ अमेरिकेला परत गेले होते. आता प्रयोग करणारे विमानही परत पाठविण्यात आले आहे. प्रयोग सुरू होण्यापूर्वी विभागीय आयुक्त कार्यालयावर सी- बॅण्ड डॉप्लर रडार कार्यालयामध्ये कंट्रोलरुमही तयार करण्यात आली होती. आता येत्या काही दिवसांमध्ये रडारही काढून टाकण्यात येणार असल्याचे विभागीय आयुक्त कार्यालयातील सुत्रांनी सांगितले.
अत्यल्प पावसामुळे मराठवाड्यातून नऊ ऑगस्टपासून कृत्रिम पावसाच्या प्रयोगाला सुरुवात करण्यात आली होती. दरम्यान, तीन महिन्यांच्या कालावधीमध्ये या विमानाने मराठवाडा, उत्तर महाराष्ट्र, विदर्भ तसेच पश्चिम महाराष्ट्रातील गावांवर असलेल्या उपयुक्त ढगांमध्ये फवारणी केली. या विमानाने एकूण ५६ दिवस उड्डाण करून तब्बल ८२६ फ्लेअर्स ढगांमध्ये जाळून कृत्रिम पावसाचा प्रयोग केला तर २५ दिवस या विमानाचे उड्डाणच झाले होते. ऑगस्ट महिन्यामध्ये राज्यामध्ये पावसाने थैमान घातले. या महिन्याभरात मराठवाड्यात तब्बल ३३७ टक्के अधिकचा पाऊस झाला तरीही कृत्रिम पावसाने १८ दिवस उड्डाण करून १४१ फ्लेअर्सद्वारे ढगात फवारणी केली होती. दरम्यान, महिन्याअखेरीस कृत्रिम पावसाचे उड्डाण बंद करण्याचे तोंडी आदेश देण्यात आले होते. औरंगाबाद येथे १०० तासांवर १०० तास मोफत या तत्वावर ख्याती वेदर मॉडिफिकेशन या संस्थेला प्रयोगाकरिता कंत्राट देण्यात आले होते.
केवळ ऑक्टोबर महिन्यात झालेला अतिरिक्त पाऊस
जिल्हा............... वार्षिक सरासरीच्या तुलनेत
औरंगाबाद.......................३१.२३
जालना............................३६.६७
परभणी............................२८.६४
हिंगोली...........................१४.६१
नांदेड...........................२१.६३
बीड.............................३९.१८
लातूर............................२७.६९
उस्मानाबाद....................३२.०७