म. टा. प्रतिनिधी, औरंगाबाद
शहरात दिवाळीच्या सुट्यांमध्ये बाहेरगावी गेलेल्या नागरिकांच्या घराला चोरट्यांनी लक्ष्य केले आहे. म्हाडा कॉलनी येथे घरफोडीत अडीच लाखांचा ऐवज लंपास करण्यात आला; तसेच महावीर चौकात प्रवासी महिलेचे एक लाखाचे दागिने पळवण्यात आले. याप्रकरणी सबंधित पोलिस ठाण्यात गुन्हे दाखल करण्यात आले आहे.
घरफोडीची मोठी घटना बुधवारी दुपारी तीन ते रात्री साडेआठ यादरम्यान मूर्तीजापूर, म्हाडा कॉलनी येथे घडली. येथील नितीन रामदास वाल्हेकर या तरुणाचे रामनगर भागात कपड्याचे दुकान आहे. नितीनची आई व पत्नी बुधवारी दुपारी त्याला मदत करण्यासाठी घराला कुलूप लावून दुकानात गेल्या. रात्री साडेआठ वाजता त्या घरी परतल्या. यादरम्यान चोरट्यांनी त्यांच्या घराचा कडी-कोयंडा तोडून आत प्रवेश केला. बेडरुममधील कपाट फोडून चोरट्यानी सामान अस्ताव्यस्त केले. कपाटातील रोख रक्कम व दागिने असा अडीच लाखांचा ऐवज चोरट्यांनी चोरून नेला. वाल्हेकर यांनी सिडको एमआयडीसी पोलिसांना या घटनेची माहिती दिली. याप्रकरणी सिडको एमआयडीसी पोलिस ठाण्यात अज्ञात आरोपीविरुद्ध गुन्हा दाखल करण्यात आला असून, सहायक फौजदार मुरलीधर सांगळे तपास करीत आहेत.
…
\Bप्रवासी महिलेचे लाखाचे दागिने लांबवले\B
प्रवासी महिलेचे एक लाख रुपयाचे दागिने चोरट्यांनी लंपास केले. ही प्रवासी महिला बुधवारी दुपारी बाबा पेट्रोल पंप चौकातून रिक्षामध्ये घरी जाण्यासाठी बसली होती. यावेळी तिच्यासोबत आणखी दोन महिला आणि मुलगी होती. क्रांतीचौक येथे या महिलेचे लक्ष विचलित करून महिलेच्या गळ्यातून ३६ ग्रॅमचे एक लाखाचे मंगळसूत्र या संशयित आरोपींनी लंपास केले. काही वेळाने हा प्रकार महिलेच्या लक्षात आला. याप्रकरणी महिलेच्या तक्रारीवरून तिन्ही संशयित महिला आरोपीविरुद्ध क्रांतीचौक पोलिस ठाण्यात गुन्हा दाखल करण्यात आला आहे. याप्रकरणी पीएसआय गायकवाड तपास करीत आहेत.
…
\Bघरातून १४ हजारांचा ऐवज लांबवला\B
घराच्या दरवाजाजवळ ठेवलेला मोबाइल व रोख चार हजाराची रक्कम चोरट्यांनी चोरून नेली. हा प्रकार गुरुवारी सकाळी सात वाजता सुरेवाडी हर्सूल येथे घडला. येथील दिगंबर किसन गायकवाड यांनी याप्रकरणी हर्सूल पोलिस ठाण्यात तक्रार दाखल केली. गायकवाड हे आंघोळीसाठी गेले असता चोरट्यांनी संधी साधून हा ऐवज लांबवला. याप्रकरणी सहायक फौजदार जवखेडे तपास करीत आहेत.