म. टा. प्रतिनिधी, औरंगाबाद
तरुणाईच्या सप्तरंगी कलाविष्काराने युवा महोत्सव लक्षवेधी ठरला आहे. प्रहसन, वादविवाद, लोकनाट्य, मिमिक्री, भारुड, पोवाडा, लावणी, सुगम गायन, शास्त्रीय गायन, समूह गायन, एकांकिका, चित्रकला, फोटोग्राफी कला प्रकारात विद्यार्थी कलाकारांनी अस्सल सृजनशीलतेची प्रचिती दिली. सादरीकरण पाहणाऱ्या इतर संघांनी प्रतिसाद दिल्यानंतर स्पर्धेत अधिक रंग भरले.
डॉ. बाबासाहेब आंबेडकर मराठवाडा विद्यापीठाच्या युवा महोत्सवाचा दुसरा दिवस (२२ नोव्हेंबर) बहारदार सादरीकरणाने गाजला. सृजनरंग मंचावर समूह गायन स्पर्धा झाली. या स्पर्धेत राष्ट्रीय भावना जोपासणारी गीते विद्यार्थ्यांनी सादर केली. लोकरंग मंचावर वासुदेव व भारुड सादर झाले. शिक्षणाचा वसा सांगणारा वासुदेव लक्षवेधी ठरला. धमाल भारुडानेही विद्यार्थ्यांना खिळवून ठेवले. नाट्यरंग मंचावर शास्त्रीय नृत्य स्पर्धा झाली. एकूण १८ संघांनी नोंदणी केली असली तरी, फक्त सहा संघांनी सादरीकरण केले. प्रहसन प्रकारालाही प्रतिसाद मिळाला. राजकीय भाष्यावर कलाकारांनी परखड भाष्य केले. बेरोजगारी, नोटबंदी, निवडणुका अशा समस्यांना उपहासातून उत्तम सादर करण्यात आले. गुरुवारी वेळेअभावी राहिलेल्या एकांकिका शुक्रवारी रात्री उशिरा सादर झाल्या. नादरंग मंचावर शास्त्रीय गायन आणि सुगम गायन सादर झाले. ललितरंग येथे कोलाज, स्पॉट फोटोग्राफी, मृदमुर्तीकला आणि शॉर्टफिल्म स्पर्धा झाली. कोलाजमध्ये २५ विद्यार्थी सहभागी झाले.
\Bनटरंग मंचाला प्रतिसाद\B
नटरंग मंचावर सकाळच्या सत्रात मिमिक्री सादरीकरण झाले. विद्यार्थ्यांनी लोकप्रिय कलाकार, नेते यांची हुबेहूब नक्कल सादर केली. शाहरुख खान, निळू फुले, नाना पाटेकर, दादा कोंडके, सचिन तेंडुलकर यांच्या आवाजाने स्पर्धेत धमाल उडवली. काही स्पर्धकांनी कार्टून पात्र, प्राणी, वाहन आणि शस्त्रांचे आवाज काढून वातावरण निर्मिती केली. उत्साह आणि क्षमता यांचा पुरेपूर मिलाफ झालेल्या मिमिक्री स्पर्धेला प्रतिसाद मिळाला. मात्र, नोंदणी केलेल्या ४० पैकी फक्त १७ स्पर्धकांनी सादरीकरण केले. विस्कळीतपणा निर्माण झाल्याने रसिकांची काही वेळ निराशा झाली.
\Bदीड जीबी डेटा-फायदा की तोटा?\B
इंटरनेटच्या अतिरिक्त वापराने तरुण पिढी भरकटल्याचा मुद्दा विद्यार्थ्यांनी पोटतिडकीने मांडला. शब्दरंग मंचावर वादविवाद स्पर्धा झाली. प्रतिकूल आणि अनुकूल मुद्दे मांडत विद्यार्थ्यांनी वास्तवाचे भान दिले. 'दीड जीबी डेटा-फायदा की तोटा,' या विषयावर बोलताना स्पर्धकांनी मोबाइलचा इंटरनेट डेटा अफवा पसरवून धर्मनिरपेक्षतेवर आघात करणारा असल्याचे सांगितले. तर इंटरनेटमुळे बँकिंग सेवा सोपी झाली. ग्रामीण भागातील तरुणांना नेटवर चांगली माहिती मिळाल्याने भवितव्य घडवण्यासाठी मदत झाली, असेही काही विद्यार्थ्यांनी मांडले. कोणत्याही गोष्टीचा उपयोग सकारात्मक करायचा की नकारात्मक हे स्वत:वर अवलंबून असते, असे ठणकावून सांगत विद्यार्थ्यांनी मुद्दे पूर्ण केले.
कोलाज कला प्रकारात फुलदाणी साकारण्याचा आनंद मिळाला. या स्पर्धेत खिडकीतून दिसणारे दृश्य आणि फुलदाणी विषय देण्यात आले होते. रंगसंगती साधताना कौशल्य वापरता आले.
-अभिजीत काळे, स्पर्धक
फोटोग्राफी स्पर्धेसाठी छायाप्रकाश विषय देण्यात आला आहे. विद्यापीठ कॅम्पसमध्ये फोटोग्राफी करण्याची संधी मिळाली. हा परिसर नयनरम्य असल्याने स्पर्धक समाधानी होते.
-आदिनाथ घुगे, स्पर्धक
शॉर्टफिल्म स्पर्धेत सहभाग घेतला आहे. सिनेमॅटोग्राफी करताना खूप काही शिकता आले. शॉर्टफिल्म निर्मितीची प्रक्रिया जवळून अनुभवता आली.
-आकाश कोल्हे, स्पर्धक