वाळूज महानगर: गंगापूर तालुक्यातील आंबेगाव शिवारातील एका शेततळ्यात बुधवारी सकाळी मृतदेह तरंगताना आढळले. अमोल संभाजी थोरात (वय, २१ रा. आंबेगाव, ता. गंगापूर), असे मृताचे नाव आहे. त्याने आत्महत्या केली की घातपात हे कळू शकले नाही. तो बीए तृतीय वर्षाचा विद्यार्थी होता, घरची परिस्थिती हलाखीची असल्याने, तसेच नोकरी मिळत नसल्याने आर्थिक विवंचनेतून आत्महत्या केली असावी, अशी चर्चा परिसरातील नागरिक करत आहेत. मुस्तफाबाद शिवारात गट नंबर २० येथे थोरात कुटुंबाची वडिलोपार्जित दीड एकर शेती असून त्यावर बँकेचे कर्ज आहे. शेती शेजारील परमेश्वर थोरात यांच्या शेततळ्यात मृतदेह सापडला. पोलिस उपनिरीक्षक प्रशांत गंभीरराव, सहायक फौजदार एस. सी. सिद्दीकी, पोलिस शिपाई कय्युम पठाण, सुखदेव कोल्हे आदींनी घटनास्थळी जाऊन नागरिकांच्या मदतीने मृतदेह बाहेर काढला. घाटी रुग्णालयात दाखल केले असता डॉक्टरांनी तपासून मृत घोषित केले. या प्रकरणी वाळूज एमआयडीसी पोलिस ठाण्यात नोंद करण्यात आली असून पुढील तपास सहायक फौजदार काकासाहेब जगदाळे हे करत आहेत.
शेततळ्यात आढळला तरुणाचा मृतदेह
गंगापूर तालुक्यातील आंबेगाव शिवारातील एका शेततळ्यात बुधवारी सकाळी मृतदेह तरंगताना आढळले अमोल संभाजी थोरात (वय, २१ रा आंबेगाव, ता...
महाराष्ट्र टाइम्स.कॉम 12 Dec 2019, 4:00 am