नोटाबंदीमुळे मंदी हा कांगावा: चंद्रकांत पाटील

मटा ऑनलाइन वृत्त। जालना

नोटाबंदीच्या निर्णयाला एक वर्ष पूर्ण होत असताना विरोधकांकडून आज काळा दिवस पाळला जात आहे. या पार्श्वभूमीवर राज्याचे महसूल मंत्री चंद्रकांत पाटील यांनी नोटाबंदीचे जोरदार समर्थन केले. नोटाबंदीमुळे मंदी आली असा केवळ कांगावा करण्यात येत असल्याची टीका महसूल मंत्र्यांनी विरोधकांवर केली आहे. आज देशात कुठेही महागाई किंवा मंदी अस्तित्वात नसून सर्वसामान्य माणूस खूश आहे असा दावाही महसूल मंत्र्यांनी केला आहे. मराठवाड्याच जालना येथे ते पत्रकारांशी बोलत होते.

केंद्र सरकारच्या नोटाबंदीच्या निर्णयाचे जोरदार समर्थन करत चंद्रकांत पाटील यांनी आता लोक कॅशलेस व्यवहाराकडे मोठ्या प्रमाणात वळत असल्याचे म्हटले आहे. देशात नोटाबंदीचा कुठेही उलटा परिणाम दिसत नाही. उलट आता कॅशलेश व्यवहार करणे लोकांना सोईचे आणि सोपे असल्याचे वाटू लागले असल्याचेही ते पुढे म्हणाले. ज्यांनी वर्षानुवर्षे सर्वसामान्यांचे रक्त शोषून अमाप संपत्ती जमा केली आणि आपल्या गादीखाली दडलली, अशा लोकांनाच आपल्या नोटा बँकेच जमा कराव्या लागल्या असे म्हणत सर्वसामान्यांना नोटाबंदीचा मोठा त्रास झाल्याच्या आरोपाचे पाटील यांनी खंडन केले.

गेल्या वर्षी ८ नोव्हेंबरला केंद्र सरकारने नोटाबंदीचा निर्णय जाहीर केला. या निर्णयाचा निषेध करण्यासाठी राज्यभरात विरोधकांनी काळा दिवस पाळला. सरकारच्या नोटाबंदीच्या निर्णयाचे समर्थन करत महसूल मंत्र्यांनी विरोधकांना उत्तर देण्याचा प्रयत्न केला.