म. टा. प्रतिनिधी, औरंगाबाद
तीन दिवसांच्या जागतिक धम्म परिषदेची जय्यत तयारी सुरू असून मिलिंद महाविद्यालाच्या मैदानावर आसनव्यवस्था करण्यात आली आहे. आंतरराष्ट्रीय परिषदेची शहरात जय्यत तयारी सुरू आहे. या परिषदेत देश-विदेशातील भिक्खू व उपासक-उपासिका सहभागी होणार आहेत.
शहरात मिलिंद महाविद्यालयाच्या स्टेडिअमवर २२ ते २४ नोव्हेंबर या कालावधीत जागतिक धम्म परिषद होणार आहे. या परिषदेची तयारी अंतिम टप्प्यात पोहचली आहे. शुक्रवार २२ नोव्हेंबर रोजी सायंकाळी सहा वाजता परिषदेचे उद्घाटन करण्यात येणार आहे. २३ नोव्हेंबरला सकाळी ध्यानसाधना होईल. तर चौका येथील लोकुत्तरा बुद्ध विहारात दलाई लामा भिख्खू संघाशी संवाद साधणार आहेत. दुपार आणि सायंकाळच्या सत्रात धम्मदेसना होणार आहे. २४ नोव्हेंबरला सकाळी साडेनऊ वाजता दलाई लामा मार्गदर्शन करणार आहेत. या कार्यक्रमाला एक लाख धम्म उपासक-उपासिका उपस्थित राहणार आहेत. तर सायंकाळी साडेपाच वाजता परिषदेचा समारोप होणार आहे. बौद्ध भिख्खू शहरातील निवास करणार आहेत. या परिषदेला अखिल भारतीय भिक्खू संघाचे भदन्त सदानंद महास्थवीर, भदंत डॉ. वरककोंडा, बोधिपालो महाथेरो, भदंत मैत्री महाथेरो (नेपाळ), भदंत संघसेना (लडाख), भदंत शिवली थेरो (श्रीलंका), भदंत विनया रखीता थेरो (भारत), भदंत सुमेद थेरो (श्रीलंका), भदंत वान्सन (दक्षिण कोरिया), भदंत प्रधामबधिवाँग (थायलंड), भदंत प्रहमा केयरती श्रीउथाना (थायलंड), डॉ. प्रहमा अनचोन खामी, भदंत पीच सेम (कंबोडिया), भदंत सन सेम (कंबोडिया), भदंत वॉनंग (दक्षिण कोरिया) आणि भदंत चंदिमा (सारनाथ) यांची प्रमुख उपस्थिती राहणार आहे. समस्त उपासक-उपासिका संघा परिषदेचे नियोजन करीत आहे.
शहरात चार ठिकाणी जागतिक परिषदेच्या सभास्थळाच्या प्रवेशद्वाराच्या थ्री-डी प्रतिकृती उभारण्यात आल्या आहेत. हा सेल्फी पॉइंट असून क्रांती चौक, पैठणगेट, छावणी आणि फुलेनगर येथे सेल्फी पॉइंट उभारले असून पर्यटक आणि नागरिकांची गर्दी वाढत आहे. शहरात रविवारी वाहन फेरी काढून जनजागृती करण्यात आली आहे.
दरम्यान, मिलिंद महाविद्यालयाच्या मैदानावर आसनव्यवस्था तयार करण्यात आली आहे. मैदानावर भव्य मंच उभारला असून मॅट अंथरण्याचे काम सुरू आहे. उपासक-उपासिकांसाठी सर्व सुविधा पुरवण्यासाठी संयोजन समितीने जोरदार नियोजन केले आहे.
'शाहिरी जलसा' आज
जागतिक धम्म परिषदेचा प्रसार व प्रचार करण्यासाठी शाहीर संभाजी भगत यांचा 'शाहिरी जलसा' आयोजित करण्यात आला आहे. तसेच कुणाल वराळे व राजेश देहाडे यांचा बुद्ध-भीमगीताचा कार्यक्रम होणार आहे. टीव्ही सेंटर परिसरातील राजमुद्रा चौकात मंगळवारी सायंकाळी सात वाजता कार्यक्रम होईल. या कार्यक्रमाला उपस्थित रहावे, असे आवाहन धम्मरत्न मित्रमंडळाचे दिलीप रगडे, एकनाथ पाखरे, मिलिंद दाभाडे, विलास पांडे, सुनील खरात, प्रकाश सोनवणे, उत्तम तांबे, रमेश वानखेडे, उत्तम जाधव यांनी केले आहे.