म. टा. प्रतिनिधी, औरंगाबाद
वडिलांसोबत झोपलेल्या अडीच वर्षाच्या चिमुकलीवर लैंगिक अत्याचार झाल्याची घटना २३ सप्टेंबर रोजी राहुरी रेल्वे स्टेशनवर घडली. तीन दिवस उपचार न मिळाल्याने या चिमुकलीचा अखेर गुरुवारी सायंकाळी मृत्यू झाला. तिची आई मुलीचे कलेवर घेऊन रात्रभर रेल्वे स्टेशनवर झोपली. दरम्यान, शुक्रवारी सकाळी मुलीच्या मद्यपी वडिलाने क्रांतीचौकात गोंधळ घातल्याने नागरिकांनी त्यांना बेदम चोप देत पोलिसांच्या स्वाधीन केले. यानंतर हा प्रकार उघडकीस आला.
या प्रकरणातील पीडित मुलीचे वडील मनमाड येथील ढाब्यावर कामगार आहे. पत्नी, ११ वर्षांचा मुलगा, आठ वर्षांची मुलगी, अडीच वर्षांची मुलगी आणि चार महिन्यांची अजून एक मुलगी, असे हे कुटुंब आहे. २३ सप्टेंबर रोजी हे कुटुंब मनमाड येथून इगतपुरीला जाण्यासाठी रेल्वेत चढले. मात्र, रेल्वे चुकल्याचे लक्षात आल्याने ते राहुरी रेल्वे स्टेशनवर उतरण्याचा निर्णय घेतला. वडील आणि अडीच वर्षांची मुलगी रेल्वेतून खाली उतरले. पण, रेल्वे सुरू झाल्याने आई आणि इतर मुले रेल्वेतच राहिले. वडील आणि मुलगी राहुरी रेल्वे स्टेशनवरच झोपले होते. यावेळी एक तोंड ओळख झालेली व्यक्ती त्यांच्यासोबत होती. राहुरी रेल्वे स्टेशनवर २३ सप्टेंबरच्या रात्री या चिमुकलीवर लैंगिक अत्याचार झाले. मुलीचे गुप्तांग जखमेमुळे पूर्णपणे सुजले होते. दरम्यान, दुसऱ्या दिवशी वडील आणि आई-मुलांची पुन्हा मनमाड येथे भेट झाली. आईने मुलीची अवस्था पाहिल्यानंतर नवऱ्याकडे विचारणा केली असता त्याने काही माहिती नसल्याचे सांगितले. दरम्यान, आई ही पीडित चिमुकली आणि इतर मुलांसह औरंगाबाद येथे आली. ते मुकुंदवाडी येथील नणंदेकडे ते थांबले होते. नणंदेने त्यांना मुलीला जादूटोणा झाल्याचे सांगत गंडे दोरे करण्याचा सल्ला दिला. यामुळे मुलीवर उपचार झाले नसल्याने तिचे गुरुवारी सायंकाळी निधन झाले. दरम्यान, पीडित मुलीची आई नणंदेचे घर सोडून गुरुवारी रात्री रेल्वे स्टेशनवर आली. मृत मुलीला घेऊन ती तेथेच झोपी गेली. दरम्यान, गुरुवारी रात्री पीडित मुलीचे पिता औरंगाबादला बहिणीकडे आला व शुक्रवारी सकाळी कुटुंबाचा रेल्वे स्टेशनवर शोध घेतला.
…
\Bमद्यपी वडिल्याच्या गोंधळामुळे घटना उघडकीस \B
पीडित मुलीच्या वडिलाने शुक्रवारी भरपूर दारू पिली होती. रेल्वे स्टेशनवरून हे कुटुंब रिक्षाने क्रांतीचौक मार्गे मुकुंदवाडीकडे जात होते. पण, वडील गोंधळ घालत असल्याने रिक्षाचालकाने त्यांना क्रांतीचौकात उतरवून दिले. यानंतर मद्यपी पित्याने मृत चिमुकलीला रस्त्यावर टाकत चांगलाच गोंधळ घातला. त्यामुळे मुलीवर अत्याचार झाल्याचे नागरिकांच्या लक्षात आले. वडिलांने मुलीवर अत्याचार केल्याचा संशय आल्याने नागरिकांनी त्याला चोप दिला. हा प्रकार समजल्यानंतर क्रांतीचौक पोलिसांनी मद्यपी वडिलासह कुटुंबाला ताब्यात घेतले. अधिक चौकशीत या मुलीवर अत्याचार झाल्याचे समोर आले. पीडित मुलीचा मृतदेह पोस्टमार्टेमसाठी घाटी रुग्णालयात पाठविण्यात आला असून पोलिसांना अहवालाची प्रतीक्षा आहे. घटना गंभीर असल्याने क्रांतीचौक पोलिस ठाण्याचे निरीक्षक उत्तम मुळुक, एपीआय राहुल सूर्यतळ, पीएसआय गजानन सोनटक्के हे पथकासह घाटी रुग्णासलयात ठाण मांडून होते. या प्रकरणी क्रांतीचौक पोलिस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती.
…
\Bमुलीच्या अंगावर चटके\B
पीडित चिमुकलीवर अत्याचार कोणी केला, हा प्रश्न पोलिसांसमोर आहे. दरम्यान, सामाजिक सुरक्षा समितीच्या सदस्या किरण शर्मा आणि स्मिता जोशी यांच्यासमोर पीडित मुलीच्या आईची चौकशी करण्यात आली. या चिमुकलीच्या अंगावर सिगारेटचे चटके दिल्याचे व्रण असल्याची माहिती सूत्रांनी दिली.