आणखी दोघे दगावले; औरंगाबादमध्ये करोनाचे एकूण ४१ बळी

औरंगाबाद: औरंगाबादमध्ये घाटी रुग्णालयात उपचार घेत असलेल्या आणखी दोघांचा करोनामुळे मृत्यू झाला आहे. त्यामुळे जिल्ह्यातील करोनाबाधितांच्या मृत्युची संख्या ४१ झाली आहे. तसेच आतापर्यंत ११७३ बाधित आढळून आले आहेत, तर ४५१ बाधित करोनामुक्त होऊन घरी परतले आहेत.

आसेफिया कॉलनी येथे राहणाऱ्या एका ४८ वर्षीय व्यक्तीला १९ मे रोजी घाटी रुग्णालयात उपचारासाठी दाखल करण्यात आले होते. त्याला दोन्ही फुफ्फुसांचा न्यूमोनिया होता. त्याशिवाय त्याला उच्च रक्तदाबाचाही त्रास होता. त्यातच त्याला करोनाचा संसर्ग झाल्याने उपचार सुरू असतानाच काल बुधवारी सकाळी साडे अकराच्या सुमारास त्याचा मृत्यू झाला. काल संध्याकाळी त्याचा स्वॅब रिपोर्ट आला असता त्याला करोनाची लागण झाल्याचं आढळून आलं आहे.

जळगाव, अकोला, बीडमध्ये २५ नवे बाधित; मुंबईहून आलेल्यांमुळे संसर्ग

तसेच रेहमानिया कॉलनी येथे राहणाऱ्या एका ६५ वर्षीय व्यक्तीला बुधवारी घाटीमध्ये दाखल करण्यात आले होते. त्यालाही दोन्ही फुफ्फुसांचा न्यूमोनिया झाला होता. शिवाय त्याला गंभीर श्वसनविकार, मधुमेह, उच्च रक्तदाब व हृदयविकाराचाही त्रास होता. अनेक आजार असल्यामुळे उपचार सुरू असताना काल बुधवारी सकाळी सव्वा दहाच्या सुमारास त्याचा मृत्यू झाला. संबंधित रुग्ण हा करोनाबाधित असल्याचे बुधवारी सायंकळी प्राप्त झालेल्या स्वॅब रिपोर्टवरुन स्पष्ट झाले, असे घाटी प्रशासनाच्या वतीने कळवण्यात आले. त्यामुळे आतापर्यंत करोनाबाधितांच्या मृत्युची संख्या ४१ झाली आहे. यातील ३८ बाधितांचे मृत्यू हे घाटीमध्ये झाले आहे, तर एक मृत्यू जिल्हा सामान्य रुग्णालयामध्ये व दोन मृत्यू हे शहरातील खासगी रुग्णालयामध्ये झाले आहेत.

मुंबई महापालिका आता नर्सिंग होम्सच्या खाटा ताब्यात घेणार