दोन महिन्यांत दोन लाख चाचण्या

म. टा. प्रतिनिधी, औरंगाबाद

फेब्रुवारीपासून आतापर्यंत म्हणजे सुमारे दोन महिन्यात दोन लाखांवर नागरिकांच्या करोना चाचण्या करण्यात आल्या आहेत, अशी माहिती महापालिकेच्या आरोग्य वैद्यकीय अधिकारी डॉ. नीता पाडळकर यांनी दिली. करोना चाचणीसह लसीकरण करून घेण्याची व करोनाबाधित व्यक्तीची माहिती महापालिकेला कळविण्याची जबाबदारी त्या-त्या गृहनिर्माण संस्थेच्या अध्यक्ष व सचिवांवर टाकण्यात येणार आहे, असेही त्यांनी स्पष्ट केले.

डॉ. नीता पाडळकर यांनी गुरुवारी (१५ फेब्रुवारी) 'फेसबुक लाइव्ह'च्या माध्यमातून संवाद साधला. या वेळी त्यांनी करोना संबंधीच्या विविध विषयांची माहिती दिली.त्या म्हणाल्या, 'फेब्रुवारीपासून शहरात करोनाची दुसरी लाट आली आहे. त्यामुळे रुग्णांची संख्या झपाट्याने वाढू लागली आहे. फेब्रुवारीपासून आतापर्यंत महापालिकेच्या माध्यमातून दोन लाख तीन हजार ३९१ नागरिकांच्या करोना चाचण्या करण्यात आल्या आहेत. करोना चाचणीसाठी ६२ पथके तयार करण्यात आली आहेत. त्याशिवाय शहराच्या सहा एन्ट्री पॉइंटवरही पथके नियुक्त करण्यात आली आहेत. सोळा कायमस्वरुपी तर नऊ फिरती फथके देखील तयार करण्यात आली आहेत. चार कोव्हिड केअर सेंटरमध्ये चोवीस तास करोना चाचणीची व्यवस्था करण्यात आली आहे. सध्या पॉझिटिव्हिटीचा दर १९ टक्के असून, तो आणखी कमी झाला पाहिजे, याकडे यंत्रणेचे लक्ष आहे.'

करोना नियंत्रणासाठी महापालिकेने प्रतिबंधित क्षेत्र जाहीर केले आहेत, असे सांगताना डॉ. पाडळकर म्हणाल्या, 'सूक्ष्म, मध्यम आणि मोठे अशा तीन स्वरुपाची प्रतिबंधित क्षेत्रे आहेत. सूक्ष्म (मायक्रो) प्रतिबंधित क्षेत्रातील करोना संसर्गाचे प्रमाण कमी करण्यावर भर दिला जाणार आहे. त्यासाठी अपार्टमेंट, गृहनिर्माण संस्था, गृहप्रकल्पाच्या अध्यक्ष, सचिवांवर जबाबदारी टाकण्यात येणार आहे. त्यांनी आपल्या भागातील जास्तीत जास्त नागरिकांचे लसीकरण करून घ्यावे, करोना चाचण्या करून घ्याव्यात. करोनाबाधित व्यक्ती माहिती महापालिकेला द्यावी, असे अध्यक्ष व सचिवांना कळवले जाणार आहे. करोना संसर्ग रोखण्यासाठी प्रतिबंधित क्षेत्रात काम करण्यासाठी स्वसंसेवकांनी पुढाकार घ्यावा, महापालिकेला सहकार्य करावे.'

रेमडिसिव्हरचा मुबलक पुरवठा

गंभीर स्वरुपाच्या करोनाबाधित व्यक्तींच्या उपचारासाठी वापरण्यात येणाऱ्या रेमडिसिव्हर इंजेक्शनचा महापालिकेकडे मुबलक साठा आहे, आणखीन इंजेक्शनची खरेदी केली जाणार आहे, असे डॉ. नीता पाडळकर यांनी सांगितले. अँटिजेन पद्धतीच्या चाचणीचे तीन लाख तर आरटीपीसीआर पद्धतीच्या चाचणीचे साठ हजार किटस् पालिकेकडे उपलब्ध आहेत, अशी माहितीही त्यांनी दिली.