\Bम. टा. प्रतिनिधी, औरंगाबाद
\Bघरासमोर हॅन्डल लॉक करून उभी केलेली दुचाकी चोरणारा प्रदीप बाबूराव जाधव याला पाच महिने कारावास व एक हजार रुपये दंडाची शिक्षा प्रथम वर्ग न्यायदंडाधिकारी डी. एस. वमने यांनी ठोठावली. विशेष म्हणजे घटना घडल्यानंतर केवळ आठव्या महिन्यांत शिक्षा ठोठावण्यात आली आहे.
या प्रकरणात गालेश्वर उत्तम शिरसाठ (४५, रा. शिवशंकर कॉलनी) यांनी फिर्याद दिली होती. फिर्यादीनुसार, २३ एप्रिल रोजी शिरसाठ हे दुचाकीवर म्हाडा कॉलनीत राहणारा त्यांचा मित्र व्ही. एन. राजगिरे याच्याकडे गेले होते. तिथे दुचाकी हॅन्डल लॉक करुन शिरसाठ हे राजगिरे यांच्यासह त्यांच्या कारमध्ये बदनापूर येथे निवडणूक कर्तव्यावर गेले होते. दुसऱ्या दिवशी दुचाकीची चोरी झाल्याचे स्पष्ट झाल्यानंतर एमआयडीसी सिडको पोलिस ठाण्यात गुन्हा दाखल करण्यात आला होता व त्याच दिवशी प्रदीप बाबूराव जाधव (२५, रा. नारेगाव) याला अटक करण्यात आली होती. तेव्हापासून तो कारागृहात आहे. खटल्यावेळी, सहाय्यक सरकारी वकील एन. ए. ताडेवार यांनी सहा साक्षीदारांचे जबाब नोंदवले. दोन्ही बाजूंच्या युक्तिवादानंतर व साक्ष-पुराव्यांवरून न्यायालयाने प्रदीप जाधव याला दोषी ठरवले आणि भारतीय दंड संहितेच्या ३७९ कलमान्वये पाच महिने कारावास व एक हजार रुपये दंड व दंड न भरल्यास एक महिना अतिरिक्त कारावासाची शिक्षा ठोठावली. प्रकरणात पैरवी अधिकारी म्हणून एस. बी. भागडे यांनी काम पाहिले.