दम असेल तर माझ्याविरोधात लोकसभा निवडणूक लढा; दानवेंचं अब्दुल सत्तारांना थेट आव्हान

औरंगाबाद : राजकारणातील कट्टर शत्रू असलेले महसूल राज्यमंत्री अब्दुल सत्तार आणि केंद्रीय रेल्वे राज्यमंत्री रावसाहेब दानवेंनी पुन्हा एकदा एकमेकांवर आरोपांची तोफ डागली आहे. सोयगाव पंचायत समितीच्या विजयानंतर सत्तार यांनी केलेल्या टीकेला आता दानवेंनी उत्तर दिलं आहे. दम असेल तर सत्तार यांनी लोकसभेत माझ्या विरोधात लढावं, असं थेट आव्हान दानवेंनी अब्दुल सत्तारांना दिलं आहे. औरंगाबादच्या पिंप्रीराजा येथे आयोजित करण्यात आलेल्या युवा मोर्चा भाकरी घरच्या डब्बा पार्टी कार्यक्रमात ते बोलत होते.

यावेळी पुढे बोलताना दानवे म्हणाले की, सत्तार म्हणतात मी सिल्लोडमधून लढावे, पण 'खुद के गली मे तो कोई भी शेर होता है', पण जर लढायचं असेल तर होऊन जाऊ द्यावं लोकसभेला, असेल दम तर त्यांनी माझ्याविरोधात लोकसभेला लढावं, असं थेट आव्हानच दानवे यांनी सत्तार यांना दिलं.

मी राजकारणातील कुंभार.…

मी राजकारणातील कुंभार आहे. हातातलं मडकं फुटलं की कुंभार रडत नाही. फेकून देतो आणि पुन्हा नवं तयार करतो. मी अनेक नेते तयार केले आहेत, असे वक्तव्य भाजप नेते आणि केंद्रीय रेल्वे राज्यमंत्री रावसाहेब दानवे यांनी केलं आहे.

दानवेंचा 'डब्बा पार्टी पॅटर्न'

आगामी स्थानिक निवडणुका लक्षात घेता सर्वच पक्ष कामाला लागले आहे. त्याचप्रमाणे रावसाहेब दानवे सुद्धा ग्रामीण भागातील तरुण कार्यकर्त्यांना एकत्र आणत निवडणुकीसाठी तयार करताना पाहायला मिळत आहे. विशेष म्हणजे थेट कार्यकर्त्यांसोबत डब्बा पार्टी करण्याचा त्यांचा पॅटर्न सद्या चर्चेचा विषय बनला आहे. तर पक्षातील तरुण कार्यकर्त्यांमध्ये यामुळे उत्साह वाढतांना सुद्धा पाहायला मिळत आहे.