म. टा. प्रतिनिधी, औरंगाबाद
डॉ. बाबासाहेब आंबेडकर मराठवाडा विद्यापीठातील ८५ जागा भरतीच्या जाहिरात मसुद्यास मंजुरी मिळत नाही तोच, या पदांचा अहवाल सोशल मीडियावर उपलब्ध झाला आहे. जाहिरात प्रसिद्धीस देण्यापूर्वीच ती फुटल्यामुळे विद्यापीठ प्रशासनाच्या गलथान कारभार पुन्हा चव्हाट्यावर आला आहे.
विद्यापीठातील शिक्षकांच्या मोठ्या प्रमाणात जागा रिक्त आहेत. अनेक विभाग केवळ एका शिक्षकावर सुरू आहेत. अनेक वर्षांपासून रिक्त असलेल्या जागा भरल्या जात नव्हत्या. त्यात या आठवड्यात झालेल्या व्यवस्थापन परिषदेच्या बैठकीत शिक्षकांच्या ८५ जागा भरतीच्या जाहिरात मसुद्यास मंजुरी देण्याचा निर्णय घेण्यात आला. ज्यामध्ये विविध विभागातील १८ प्राध्यापक, २८ सहयोगी प्राध्यापक २८ व ३९ सहाय्यक प्राध्यापकाच्या जागांचा समावेश आहे. व्यवस्थापन परिषदेत मंजुरीचा निर्णय होत नाही, तोपर्यंत त्यावरील पुढिल प्रक्रिया आणि वर्तमानपत्रात जाहिरात देण्यात येत नाही. मात्र, त्यापूर्वीच भरण्यात येणाऱ्या जागा कोणत्या आहेत, त्यांची पात्रता काय याची माहिती सांगणारा अहवाल सोशल मीडियावर फिरतो आहे. विद्यापीठातील पदभरतीतील गोंधळ हा नवा नाही. मात्र, विद्यापीठाची जाहीरात आधीच लिक होण्याचा हा प्रकार पहिला आहे. पात्र उमेदवारांना डावलून अपात्रांना घेणे, उमेदवार डोळ्यासमोर ठेवून पात्रता बदलणे असे अनेक आरोप विद्यापीठाच्या पदभरतीत झाले आहेत. त्यात अनेक प्रकरणे न्यायालयातही आहेत. त्यात आता मोठ्या प्रमाणात पदभरती होते आहे. भरतीची प्रक्रिया सुरू होण्यापूर्वीच संपूर्ण पदभरती चर्चेत आली आहे. त्यावर प्रशासन काय भूमिका घेते, याकडे सर्वांचे लक्ष लागले आहे.