औरंगाबाद: शासकीय वैद्यकीय महाविद्यालय व रुग्णालयातील (घाटी) अद्ययावत मॅमोग्राफी मशीन मागच्या काही दिवसांपासून नादुरुस्त झाली असून, मशीनच्या केवळ एका सुट्या भागासाठी दुरुस्ती खोळंबली आहे. हा सुटा भाग सध्या देशात उपलब्ध नसल्याने थेट जपानवरून मागवण्यात आला आहे. हा सुटा भाग २० नोव्हेंबरपर्यंत उपलब्ध होण्याची शक्यता आहे आणि त्यानंतरच मशीनची दुरुस्ती होऊन ती रुग्णसेवेत येणार आहे. या संदर्भात विभागप्रमुख डॉ. वर्षा रोटे यांच्याकडे विचारणा केली असता, येत्या बुधवारपर्यंत मशीन पूर्ववत सेवेत येईल, असे त्यांनी सांगितले. दरम्यान, विस्कळीत वीज पुरवठ्यामुळेच मॅमोग्राफी मशीनचा सुटा भाग नादुरुस्त झाल्याचे समजते. याच विस्कळीत वीज पुरवठ्यामुळे घाटीतील अनेक महागडी उपकरणे अनेकदा नादुरुस्त झाली आहेत. मात्र त्यानंतरही विद्युत विभागाकडून सुरळीत वीज पुरवठ्यासाठी ठोस प्रयत्न होत नसल्याचे दिसून येत आहेत.
घाटीचे मॅमोग्राफी मशीन नादुरुस्त
शासकीय वैद्यकीय महाविद्यालय व रुग्णालयातील (घाटी) अद्ययावत मॅमोग्राफी मशीन मागच्या काही दिवसांपासून नादुरुस्त झाली असून, मशीनच्या केवळ एका सुट्या ...
महाराष्ट्र टाइम्स.कॉम 14 Nov 2019, 4:00 am