म. टा. प्रतिनिधी, औरंगाबाद
डेंगीने अजूनही पाठ सोडलेली नसतानाच व्हायरल फिव्हर, हाय ग्रेड फिव्हर, न्युमोनिया, ब्राँकायटिसने औरंगाबादकरांना पुरते हैराण केले आहे. विशेष म्हणजे बच्चे कंपनीसह ज्येष्ठांना विषाणुजन्य आजारांचा जास्तच फटका बसत असल्याचे दिसून येत आहे. त्याचवेळी सर्दी-पडसे-खोकला व श्वसनविकार शहरवासियांची पाठ सोडत नसल्याचे सध्या तरी चित्र आहे. पुन्हा डेंगी अजूनही थांबलेला नाहीच, असेही स्पष्ट झाले आहे.
शहर परिसरात अद्यापही पूर्णपणे थंडी सुरू झालेली नाही आणि दिवसा काहीअंशी उष्णताही जाणवत आहे. त्यामुळेच विषाणुजन्य आजारांनी डोके वर काढल्याचे चित्र आहे. या संदर्भात बालरोग व नवजात शिशुतज्ज्ञ डॉ. प्रशांत चव्हाण म्हणाले, सद्यस्थितीत तीव्र ताप, सर्दी, नाक गळणे, नाक बंद होणे, घसा खवखवणे, अंगदुखी, गळून जाणे, अनेक दिवसांपासूनचा खोकला अशा तक्रारी बालकांमध्ये जास्त दिसून येत आहेत. त्यातच खोकला हा आठ-आठ, दहा-दहा दिवसांपर्यंत कायम राहात असल्याच्या तक्रारी वाढल्या आहेत. यातच काहींना कोरडा, तर अनेकांना ओला खोकला आढळून येत आहे. यापैकी काहींमध्ये गुंतागुंत वाढून न्युमोनिया, कान फुटणे, सायनुसायटिस, दमा अशा आजारांनी बच्चे कंपनी बेजार असल्याचे दिसून येत आहे. त्यातही दोन वर्षांच्या आतील व नवजात शिशुंमध्ये हे प्रमाण जास्त आढळून येत असल्याचेही डॉ. चव्हाण यांनी सांगितले. जर ताप पाचदिवसांपेक्षा जास्तवेळ राहात असेल, खोकल्याची उबळ येऊन उलटी होत असेल, श्वास घेताना नाकाजवळ किंवा छातीत घरघर आवाज येत असेल किंवा श्वासाची गती वाढून श्वास घेण्यास त्रास होत असेल, लहान मुलांना आईचे दूध पिताना त्रास होत असल्यास किंवा दूध पिणे बंद होत असल्यास वैद्यकतज्ज्ञांचा सल्ला घेणे हितावह असल्याचेही डॉ. चव्हाण म्हणाले. तीव्र तापाने बच्चे कंपनी पुरती बेजार झाली आहे आणि अनेक बालकांचा ताप चक्क १०३-१०४ पर्यंत जात आहे. ब्राँकायटिसही मुलांमध्ये वाढलेला दिसून येत आहे. तसेच न्युमोनियाही वाढल्याचे बालरोगतज्ज्ञ डॉ़. केदार सावळेश्वरकर यांनी 'मटा'शी बोलताना सांगितले. डिसेंबरला 'हेल्दी सिझन' म्हटले जाते व सर्वसाधारणपणे या दिवसांमध्ये रुग्णसंख्या कमी होते. मात्र तुलनेने 'ओपीडी'तील रुग्णसंख्या नक्कीच वाढल्याचे डॉ. सावळेश्वरकर म्हणाले.
\B'न्युमोनिया'ग्रस्तांवर दाखल करण्याची वेळ
\B'व्हायरल फिव्हर' वाढलेला आहेच; शिवाय न्युमोनियाने वयस्कर मंडळी जास्त त्रस्त असल्याचे दिसून येत आहे. सध्या आमच्या रुग्णालयात किमान १३ न्युमोनियाचे रुग्ण दाखल आहेत, असे सांगताना फिजिशियन व अतीव दक्षता तज्ज्ञ डॉ. आनंद देशमुख म्हणाले, दमा किंवा धुम्रपानाचे व्यसन असणाऱ्यांनाही श्वसनाचा त्रास वाढला आहे. खोकल्यावरही अनेक दिवस उपचार करावे लागत असल्याचेही डॉ. देशमुख म्हणाले. केवळ वयस्करांना नव्हे तर तरुणांनाही श्वसनाचे त्रास होत असल्याचे डॉ. देशमुख म्हणाले.
\Bअशी घ्यावी मुलांची काळजी
\B- थंड वातावरणात फिरणे किंवा जाणे टाळावे
- मुलांना कानपट्टी, हातमोजे, पायमोजे वापरावेत
- प्रवास टाळावा, थंड, तेलकट, तुपकट आहार टाळावा
- भरपूर पाणी प्यावे, गरम पाण्याची वाफ घ्यावी
- कोमट मिठाच्या पाण्याने चूळ भरावी
- शिंकताना, खोकलताना रुमाल वापरावा
- लहान मुलांच्या जवळ जाणे किंवा संपर्कात जाणे टाळावे
- मुलांना हाताळताना हात स्वच्छ पाण्याने व साबणाने धुवावेत